Siumup Christiansborgimi allattoqarfia sapaatip akunnerani matumani ulapaarpoq. Kalaallit Nunaata Sinniisoqarfiani ukiortaami ilasseqatigiisitsineranut Siumut Folketingimi peqataavoq. Kiisalu Aki-Matilda Høegh-Dam kiniiserit ukiortaami ilasseqatigiisitsinerannut aamma qaaqqusaalluni. Qinigaaffimmi matumani Aki-Matilda Høegh-Dam aamma siullermeerluni oqaluttarfimmit oqalugiarpoq
Allattoq: Siumut Folketingimi allattoqarfik
Folketingimi qinigaaffik sapaatip akunnerani matumani aallarteruttorfigaa.
Kalaallit Nunaat pillugu ataatsimiititaliaq siullermeerluni ataatsimiippoq pingasunngormat. Ataatsimiititaliami Aki-Matilda Høegh-Dam ukiuni tulliuttuni marlunni siulittaasuussaaq.
Ataatsimiinnerni piffissami aggersumi pilersaarutit saqqummiunneqarput.
Siumup Folketingimi ilaasortaatitaa qinigaaffimmi matumani siullermeerluni aamma oqaluttarfimmi oqalugiarpoq. Folketingimi Kalaallit Nunaat eqqartorneqartillugu kalaallit aalajangiinernut peqataanerusarnissaat pingaartillugu Aki-Matilda Høegh-Dam oqariartuuteqarpoq.
”Innuttaasunik nukittuunik tunuliaqutaqarlunga maaniissinnaanera nuannaarutigaara. Issittumi innuttaasut sinnerlugit maani sulissaanga. Sullisseqqinnissannut piareerpunga”, oqaluttarfimmit Aki-Matilda Høegh-Dam ilaatigut oqarpoq.
Partiimik pilersitseqataasoq Lars-Emil Johansen aamma Siumup siulittaasua Erik Jensen partiip allattoqarfianut aamma sisamanngormat pulaarput.
Politikkikkut suliassat saniatigut Naalakkersuisut ukiortaami ilasseqatigiisitsineranni Aki-Matilda Høegh-Dam aamma peqataavoq. Ilasseqatigiinneq Kalaallit Nunaata Sinniisoqarfiani Københavnimi ingerlanneqarpoq. Tassani Kalaallit Nunaannut tunngatillugu suliaqartut, soqutigisaqartullu, ilasseqatigiinnermi naapippai. Naapitaasa ilaraat USA-p Danmarkimi aallartitaa, Alan Leventhal.
Aki-Matilda Høegh-Dam oqaluttarfimmi oqalugiannginnermini kiniiserit aallartitaqarfiata ukiumut nutaamut ilasseqatigiisitsinerani peqataavoq. Aamma illersornissamut ministeri Jakob Ellemann-Jensen, Venstre-meersoq, marlunngormat unnukkut nereqatigaa.
Sapaatip akunnera qaangiutilersoq Aki-Matilda Høegh-Damimut aamma Siumup Folketingimi allattoqarfianut ulapaarluarfiusimavoq.
Sapaatip akunnera aggersoq pissanganarluarpoq. Aki-Matilda Høegh-Dam ataatsimiititaliami ilaasortaaffigisami ilaani nunamut allamut ilaatigut angalaqataassaaq.