Innuttaasut ataatsimoorluta toqqissilluta inooqataasinnaanissarput ujartorpara. Taamaattumik pinaveersaartitsinikkut suliaqartumik maani pilersitsinissaq angorusoqaarput. Tamatta inissaqassaagut qanorli iliorutta aaqqiisinnaavugut?
All.: Dorthe-Marie Mogensen-Fontain, Sermersuummi kommunalbestyrelsimut ilaasortaq, Siumut
Paamiuni sapaatip akunnerata naanerani, aammalu akissarsiffiusuni imigassamik atuisarneq annertuumik takussaasarpoq. Sapaatillu akunnerata kingullermi pisut assut aalassannartutut tusarpagut, ammasumik saaffiginnissuteqarpunga pinaveersaartitsinermi inuunerissaanermilu suliaqarnissaq annertunerusumik sammineqartariaqarneranik oqariartuuteqarluta Siumut Paamiuniit.
Maani illoqarfitsinni pinaveersaartitsinermik sulisuerunnikuuvugut, tamanna assigiinngitsorpassuartigut tunngaveqarpoq. Suleriaaserlu allannguiffigineqarneratigut Nuummi sulisut pingasut inissisimalernikuullutik. Taamaattumik tikinneqarnissarput pilersaarusiorfigineqarnissarlu pisariaqalerpoq.
Nalunngilarput Paamiut asasara aallartisartoq, innuttaasullu peqataatinniarneri ajornakusoorsimavoq. Innuttaasut ataatsimoorluta toqqissilluta arfininngornermi pisiniarfiliarsinnaasariaqarpugut. Innuttaasut ataatsimoorluta imigassamik tuniniaanerit pisiniarfiit avataanni inissisimasut akiortariaqarpagut.
Innuttaasut ataatsimoorluta toqqissilluta inooqataasinnaanissarput ujartorpara. Iliuusissanik pilersitsisariaqarpugut, oqallittariaqarpugut toqqissilluta tamatta inooqataassagutta. Taamaattumik pinaveersaartitsinikkut suliaqartumik maani pilersitsinissaq angorusoqaarput, taannaassaarmi illoqarfitsinni assigiinngitsunik ataqatigiissaarisumik iliuusissanik pilersitsisinnaasoq.
Pisiniarfiit iserfigiuminartariaqarput weekendini, aalakoortunik pisititsisarnerit unitsinnissaannut innuttaasut tamarmiulluta iliuuseqartariaqarpugut, sulisunut toqqissimananngitsutut isigiuarakku akisussaaffillu sulisunut kisimi tunniunneqarsinnaanngimmat.
Nakuusernerit akuerinngilagut! Tamattalu iliuuseqarsinnaasariaqarpugut ataatsimoorluta, oqallitta aammalu iliuusissanik pilersitsisa. Paamiut toqqissisimanartumik inuuffigiumallugu.
Tamatta inissaqassaagut qanorli iliorutta aaqqiisinnaavugut?