Anguniakkat

Nunalerineq uumasuuteqarnerlu

Siumut 2454 Views

Siumup sulissutigaa nunatsinni nammineerluta nerisassanik pilersornitta ineriartortinneqarnissaa annertusiartortinneqarnissaalu. Nunalerineq savaateqarnerlu ineriartortinneqassapput, pitsaassuseq tunngavigalugu periarfissanillu nutaanik ujartuiuarnikkut.

Siumut anguniarpaa, nunalerineq uumasuuteqarnerlu immitsinnut pilersornitsinnut pingaarutilittut ineriartortinneqassasut. Naatitatigut neqitigullu tunisassiorneq annertusarneqassapput, unammillersinnaasumik pitsaassuseqartumillu.

Nunalerinermut uumasuuteqarnernullu aningaasaliissutinik ineriartortitsineq ingerlaavartumik ingerlanneqassaaq, Savaatillit Peqatigiit Suleqatigiissut (SPS) suleqatigalugit.

Nunatta karsianiit savaatilinnut aningaasaliissutit akilersinnaasumik ingerlatsiartuaarnerat naapertorlugu ikiliartortinneqassapput. Tamanna anguneqassapput pisariaqarput;

  • Nunaateqarfiit attavilersuutitigut ataqatigiinnerulernissaat.
  • Savaatillit takornarialerinikkut saniatigut isertitaqarnerulernissaat.
  • Uumasuuteqarnikkut periarfissanik annertusaaneq pilersinneqassasoq.

Siumup sulissutigaa neqinik tunisassiornermut ineriartortitsivimmik pilersitsinissaq, taamaalilluni nunatsinni neqissamik pilersuineq annertunerusoq pilersinneqarsinnaanngorlugu.

Nerisassanik atortussanillu nammineq pilersorneq sapinngisamik annertusarneqassapput. Nunanit allaniit unammillerneq eqqarsaatigalugu, tunisassiornermi akit akitsuutillu appasinnerpaaffianiitsinneqarnissaat qulakkeersimaneqassaaq. Nunami namminermi assartuineq pisariillisarneqassaaq akikillisaavigineqassallunilu.

Nunatta naasuinik, paarnaanik naatitanillu tunisassiorneq ineriartortinneqassapput. Suliniut minguitsuussaaq pitsaassutsimillu salliutitsisuussaaq. Tunisassiortut akuerisamik ilinniartinneqartassapput, soorlu INUILI Narsamiittoq atorlugu.

Silaannaap allanngoriartornera ilutigalugu sinerissami nunaminertanik ineriartortitsinissaq misissoqqissaarneqartassaaq, nunalerineq uumasuuteqarnerlu periarfissanik nutaanik ammaassiffiunersoq malinnaaffigiumallugu.

Savaateqarnerup iluani pisariitsumik kinguaariit nikittarnissaat qulakkeerumallugu, aporfiusut suussusersineqassapput aaqqinneqarlutillu.