Nukissiorfimmut tunngasoq paaseqqissaassavarput

Nuummi sarfaaruttoorneq illoqarfiup ilaanni eqqornerlunneqarnerpaasuni ullut arlallit pivoq, amerlanerpaannullu ataanartumik akunnerit 17-it, kingorna qamittooqqittarnernik malitseqartumik, misigisaqarfiuvoq. Nalaatsornerinnakkut sila kialaarsimanngitsuuppat, Nuuk ajunaarnersuaqarnermik misigitinneqarsimassagaluarpoq. Taamaattumik pineqartoq paaseqqissaassavarput

Vivian Motzfeldt, Siumumi politikikkut siulittaasup tullia, susoqarpiarsimanera paaserusullugu maanna § 37-itut apeqquteqaat tunngavigalugu apeqquteqaasiorsimalerpoq. Apeqquteqaatit taamaattut Inatsisartunut ilaasortat periarfissaat, pinngitsooratik Naalakkersuisunit akineqartussaapput. Vivian isumaqarpoq, Nuummi sarfalersorneqarnerup aallarteqqinniarneqarnerani pisut pillugit, innuttaasut suli naammattumik paasissutissinneqartarsimanngitsut.

Ataasinngornermi novembarip 29-ani Nuummi sila kialaarpoq, taammallu kialaarnera ulluni tulliuttuni ingerlaannarpoq. Tamanna pissutigigunarlugu, ataasinngornermi unnukkut aqqaninngulersoq tassanngaannaq illoqarfik sarfaarummat, annertunerusumik ajunaarnersuartut pissusilimmik pisoqanngilaq. Sarfaaruteqqaneq akunnerni ataanartumik 17-18-inik sivisussuseqarpoq, illoqarfiullu ilaanni ullut arlallit pisup qaavatigut qamittooqqittarnernik malitseqartarpoq. 

– Nuummi sarfaarunneq illoqarfiup ilaanni eqqornerlunneqarnerpaanni akunnerit 25-t sinnerlugit atuuppoq, sinnerinut amerlanernullu ataanartumik akunnerit 17-it qaminngasoqarpoq, tamarmik qaavatigut qamittooqqittarnernik malitseqartartut. Sila nalaatsornerinnakkut kialaarsimanngitsuuppat qularnanngitsumik Nuuk ajunaarnersuaqarfittut inississimassagaluarpoq. Politikeritut innuttaasunut pisussaaffigalugulu akisussaaffigaarput, susoqarpiarsimanera ilisimaqqissaalissallugu, taamaalilluta tatigisinnaaniassagatsigu Nukissiorfiit kisermaassisussaatitaanerminnut atatillugu suliassaminnik kivitsisinnaasut aamma naammattumik pisinnaaneqartunik aqutsisoqartut, Vivian Motzfeldt oqarpoq.

Taassuma ilaatigut ujartorpaa, upalungaarsimanermut periusissiat suut atuutsilersinneqarsimassagaluarnersut, pingaartumik inissisimaffik aallaanerusimagaluarpat, soorlu issilluni tamatumalu malitsigisaanik ruujorit annertuumik qaaralersimagaluarpata il. il.

– Ilumoorlunga ilisimaqqissaanngilara upalungaarsimanermut periusissiat sorliit atuutsinneqassanersut, issilluni sivisuumik sarfalersuutit ajutooqqallutik Nukissiorfiit pilersuineq ajulersimassagaluarpata. Paaserusupparattaaq, Namminersorlutik Oqartussat kisermaassillutik innuttaasunut Nukissiorfiit aqqutigalugit nukissamik pilersuisussaatitaallutik qanoq inissisimassagaluarnersut. Nukissiorfiit toqqaannaq Nukissiuutinut Naalakkersuisup ataanni suliffeqarfittut inissisimapput, taanna oqarpoq.

Vivian Motzfeldt isumaqarpoq, tamatta pisoq pimoorussassatut isigalugulu tigusariaqaripput. Ujartorpaa ruujorit aserornerinut, inissarsisitseqqinnernut, iluarsartuussinernut, perlernaveeqqusiinissanut, imilersuinissanut, uunnassarfissanut il. il. Namminersorlutik Oqartussat qanoq inissisimassagaluarnersut.

– Pingaarpoq erseqqissumik paasissallugu, Namminersorlutik Oqartussat nukissamik pilersuisussatut akisussaaffigisaanut annertuumik ajutoortoqartillugu, inunnut suliffeqarfinnullu namminneq killilimmik iliuuseqarfigisinnaasaanut kikkut taarsiisussanngortitaasinnaanersut. Pingaarportaaq paaseqqissaassallugu, upalungaarsimanermut periusissiat sorliit atuutsinneqarlutik allartinneqassagaluarnersut, aamma attaveqaasersorsimanerput ilumut taamak nukingertariaqalernermi naammaginartumik atugassaanersut, taanna oqarpoq.

Vivian Motzfeldtimut pingaarportaaq paasissallugu, ilumut Nukissiorfiit ilisimasimaneraat, ullut arlallit atorlugit motoorit dieselitortut aallartinniarneqarumaartut, aallartinniarsimaneranullu iluatsitsisarsimannginnerit sunik pissuteqarnersut. Ilutigisaanik eqqumiigaa, sooq illoqarfiup ilaanni, Nuussuarmi Qinngorpumilu, tusindinik arlalinnik inulinni, allatut aaqqiissuteqarluni sarfamik pilersuisoqarsinnaasimannginnera. Isumaqarportaaq Nukissiorfiit paasissutissiisarsimanerat annertuumik isornartoqartoq.

– Eqqumiippoq ajunaarnersuartut pissuseqarfiusup nalaanni Naalakkersuisut Nukissiorfiillu oqaaseqanngilluinnarmata. Aatsaat ullut pingajussaata missaani Nukissiorfiit qarlualuttalerput, Naalakkersuisullu aatsaat politikikkut nipaarluunerat pillugu isornartorsiorneqarneq aallartimmat nuiniarsarilerput. Paaserusussavara sooq akisussaasut, nukissiuutinut pisortaq ilanngulluni, avammut nalunaarnissamut pisut nalaanni tunuarsimaarsimanersut, tamannalu sumik pissuteqarnersoq. Aatsaat nukissamik pilersuineq aallarteqqinneqareermat, qamittoornerullu pereernerata kingorna ullut arlallit qaangiummata, ilisimatitsisarniarlutik aallartipput. Taamaattumik pissusissamisoorpoq paasissallugu, taamak pisoqartillugu ilisimatitsisarnissamut Nukissiorfiit qanoq pilersaarusianik piareersimasuuteqarnersut. Ilimanarsivormi atorsinnaasunik peqarsimassanngitsut, Vivian Motzfeldt oqarpoq.

Pingaarnertut paasilluagassatut isigaa, motoorit dieselitortut aallartinniarnerinut qanoq ingerlasoqarsimanersoq, taamaalilluta tamatta ilisimaniassagatsigu, suliassat suut akisussaaffigisavut sumiginnarsimasinnaanerivut, aamma taamak pisoqaqqissanngippat suut erseqqissumik iliuuseqarfigisariaqarnersut.

– Paaserusuppara sooq akunnerit 17-it ingerlassanersut Nuummi illoqarfiup ilaanni sarfamik pilersuinerup aaqqikannerneqarnissaata tungaanut. Teknikikkut ajornartorsiutit suut nalaanneqarsimappat aamma sooq. Minnerunngitsumik ilisimasariaqarparput, taamak ajunaarnersuaqangajannera siunissami pinngitsoortinniarlugu Naalakkersuisut qanoq pilersaarutinik iliuusissanillu aallartitsisimanersut, Vivian Motzfeldt naggasiivoq.

Naalakkersuisut ullut suliffiusut qulit iluanni Vivian Motzfeldtimut akissuteqartussaapput.