Nuummi sarfaarunneq pillugu apeqquteqaatit

Vivian Motzfeldt, Inatsisartunut ilaasortaq

Inatsisartut suleriaasianni  §  37 imm. 1 naapertorlugu Naalakkersuisunut apeqqutit imaattut matumuuna saqqummiuppakka:

Nuummi novembarip 29-ani annertuumik nukissiuuteqarnikkut attaveeruttoqarnera unnukkut aqqaninngulersoq aallartippoq, tassungalu tunngatillugu imaattunik apeqquteqarpunga akineqaqqusannik.

Naalakkersuisunut apeqqutit:

1. Nuummi sarfaarunneq illoqarfiup ilaanni eqqornerlunneqarnerusunut akunnerit 25-t sinnerlugit pivoq, sinnerinilu atasuinnarmik akunnernik 17-inik kingorna sarfaaruttaqattaarnerit qaavatigut ilanngullugit.

Sila nalaatsornerinnakkut kialaarsimanngitsuuppat, taava Nuuk ajunaarnersuaqarfiusutut naatsorsuuneqarluni inissinneqarsimassagaluarpa?

Aappiuppat,

• Ajunaarnissamut sillimmatit suut atuutsilersinneqarsimassagaluarpat?

Naamiippat,

• Sooq?

2. Nukissiorfiit ilisimasimavaat piffissaq taamak sivisutigisoq atorlugu motoorit dieselitortut aallartinniarneqartussaasut?

Aappiuppat,

• Sooq innuttaasut suliffeqarfiillu aarlerisaarneqanngillat?
• Sooq Nukissiorfiit allatut pilersitsillutik illoqarfiup ilai, Nuussuaq aamma Qinngorput, pilersulersulersinnaasimanngilaat?

Naamiippat,

• Suna pissutigalugu Nukissiorfiit tamanna ilisimasimanngilaat?
  
  Motoorit dieselitortut aserfallatsaaliorneqarnissaanut peqqussutit piffissami tassani atuuttut ilanngunneqassapput.

3. Sunarpiaq pissutigalugu aatsaat akunnerit 17-it qaangiummata nukissamik pilersuineq aallartikannerneqarsinnaasimava, tassa teknikikkut ajornartorsiutit suut nalaanneqarpat aamma sooq?

4. Sooq akisussaasut, Nukissiorfiit pisortaat ilanngullugu, avammut oqaaseqarnissaminnut piumasimanngillat, aatsaallu pilersuineq ullut arlallit qaangiuttut aallarteqqinneqareermat avammut oqaaseqarnialerlutik?

5. Nukissiorfiit namminneq upalungaarsimanermut ilisimatitsisarnissamullu pilersaarutaat suuppat?

• Upalungaarsimanermut ilisimatitsisarnissamullu Nukissiorfiit pilersaarutaat, pisup nalaanni atuuttut, ilanngunneqassapput.

6. Sila kialaarsimanngitsuuppat, taava Namminersorlutik Oqartussat nukissamik pilersuinermut akisussaasutut annaasanut akisussaatinneqarsimassagaluarpat. Annaasanut ilaasinnaapput ruujorit imilersuutit, inissarsisitseqqinnerit, aserorneqarsimasut iluarsartuunneri il. il.?

Naamiippat,

• Nukissamik pilersorneqarnerup assuarnartumik kipitinneqarnerata kingunerisaanik, Namminersorlutillu Oqartussat akisussaaffigisaani, inuit suliffeqarfiillu annerusumik namminneq iliuuseqarfigisinnaanngisaannittaaq, taarsiivigineqarnissaannut kina akisussaava?

7. Nuummi ajunaarnersuaqangajannerata kingunerisaanik, assingusumik pisoqaqqinnginnissaa anguniarlugu, Naalakkersuisut suliniutinik sunik aallartitsissamaarpat?

Tunngavilersuut:

Nuummi nukissiuutit attaveerunnerinut atatillugu paaserusuppara qanorpiaq inissisimasoqarnersoq, aamma Nuummi ajunaarnersuaqangajannerata malitsigisaanik Naalakkersuisut suliniutinik sunik aallartitsissamaarlutik pilersaaruteqarnersut ilanngullugit.

Ullumi ilisimavarput nukissiuutit attaveerunnerannut pissutaasoq, Utoqqarmiut Kangerluarsunnguani erngup nukinganik innaallagissiorfimmit kabelit ingitsilersimammata. Suliaralugu nalilersussallugulu suli amigaatigaarput, motoorit dieselitortut atorlugit sarfamik pilersuiniarnermut tunngatillugu qanoq pisoqarsimanersoq, aamma siunissami taamak pisoqaqqinnginnissaa anguniarlugu suut malitsigitinneqarlutillu piareersaataanersut paasissallugit.

Suliffiusut ullut qulit iluanni akissutisinissara kissaatigaara.