Niuerneq

Nunatta niuernikkut nunanik allanik suleqateqarnera annertusassaaq – pingaartumik aalisakkanik tunisiffiit, soorlu USA, Canada aamma Island suleqatigalugit. Nunatsinni tunisassiat tapersersorneqarnerat qulakkeerneqassaaq.

Siumut suliniuteqarpoq nunat allat, pingaartumik aalisakkanik tunisiffiit, suleqatigilluarnerulernissaanik. Nunat saniligut, USA, Canada aamma Island, annertunerusumik niuernikkut suleqatigineqassapput. Kangimut imaatigut attaveqarluni niuerneq kisiat piunnaarlugu, kimmut niuernikkut ineriartortitsisoqassaaq.

Niuerneq eqqarsaatigalugu sulisunik paarlaasseqatigiittarnissaq, isumaqatigiissuteqartarnerillu ineriartortinneqassapput, nunatta pisariaqartitai tunniussinnaasaalu aallaavigalugit. EU-mut tunngatillugu, aalisarneq niuernerlu pillugit isumaqatigiissutit nutartertuarnissaat qulakkeerneqassaaq. Tamatuma saniatigut minguitsumik nukissiorneq aatsitassarsiornerlu pillugit EU-mut suleqateqarneq ineriartortinneqassaaq.

Imminut pilersorneq qulakkeerniarlugu nunatsinni tunisat pitsaanerusumik tapersersorneqassapput. Nunatsinni tunisassianut unammillertitut eqqussukkat akitsuuserneqarsinnaanerat periarfissaassaaq.

Imermik nilammillu nioqqutissiornermut niueruteqarnermullu periarfissat annertusarneqassapput, avammullu niueqateqarnissamut aporfilersuutit nungusarneqassapput.

Nuummi talittarfissuaq atorluarlugu niuerneq toqqaannarnerusumik ingerlanneqartalissaaq. Island aqqutigalugu assartuinerni iluaqutaasinnaasut misissorneqassapput, kiisalu Amerikap avannaanut niueqateqarneq siuarsarniarlugu aporfiusinnaasutut pissutaasut qulaajarneqassapput iliuuseqarfigineqarlutillu.

Kulturitta niuerutigineqarnissaa – soorlu filmiliat – suliniutigineqassaaq, kulturikkut avitseqatigiiffiusinnaasut allat ilanngullugit.

Nunami namminermi niuerneq

Namminersortut pisortallu akornanni niueqatigiinnermut akit, akitsuutit, akileraarutillu atorneqarneri naleqqussarneqassapput. Sumiiffinni nioqqutissiorneq pitsanngorsaavigineqassaaq, immikkut isiginiarneqassallutik peqqinnartut aammalu nunatsinni tunisassiat.

Nunatsinni tunisassiat annertunerusumik atorneqartalernissaat anguniarlugu, suliffeqarfiit, inuussutissarsiortut innuttaasullu aalajangersimasunik siunnerfilimmik politikeqarneq aqqutigalugu siuariartortinniarneqassapput.