Saqqaa

Inatsisitigut illersugaalluta ingerlanerput unammillerneqarpoq

Kommuneqarfik Sermersuummi borgmesteritut tunuartitaasimasup, kommunaldirektørimut tunuartitaasimasumuttaaq peersitsinermut atatillugu immikkut akissarsiassaanut pissusilersorsimanera pillugu, Nunamut Namminermut Immikkoortortaqarfiup isummersuutai inatsisitigut illersugaalluta ingerlatsinitsinnut unamminartorsiornartitsipput, tassami Nunamut Namminermut Immikkoortortaqarfiup aalajangiussai eqqoriaanernik ilimasunnernillu tunngavilersorneqarsimasunngorsimarpasipput. Nunamut Namminermut Immikkoortortaqarfiup ilatsiinnarnera naggataatigut ima kinguneqassaaq, borgmesterit atorfimminnut atatillugu iliuuserisaminnut akisussaatinneqarsinnaajunnaassammata.

All.: Doris J. Jensen, politikikkut oqaaseqartartoq, Siumut

Kommunaldirektørimut peersinneqarsimasumut nalinginnaassut qulaaterujussuarlugit immikkut akissarsiassarsiuussisimaneq paquminartoq pillugu, taamani kommunalbestyrelsimi Siumup gruppiani siulittaasumut pissutissaqartitsilersimavoq, Namminersorlutik Oqartussat Nunamut Namminermut Immikkoortortaqarfianut (nakkutilliisoqarfimmut) maalaaruteqarnissamut, tassani pineqarluni maanna borgmesteriujunnaarsimasup suliamut aqutsisimanera.

Nunamut Namminermut Immikkoortortaqarfiup suliamut isummersuutai, tusagassiuutit allagaatinik takunnissinnaatitaaneq aqqutigalugu noqqaareersullu 7. februar 2024 saqqummerput, saqqummertullu annertuumik isumakulunnaannaratik aamma inatsisitigut illersugaalluta ingerlanitsinnut apeqqusiipput, tassami inerniliunneqartut pineqartumut uniuerujussuarput.

Nunamut Namminermut Immikkoortortaqarfik isummerpoq, immikkoortortaqarfiup “qulakkeerlugu paasisinnaasimanngikkaa borgmesteriusimasoq allakkap 3. juli 2021-meersup imarisaanik qanoq ilisimasaqartiginersoq imaluunniit borgmesteriusimasoq suliamut atatillugu qanoq siunnersorneqarsimanersoq juulip 5-iani 2021-mi soraarnermut isumaqatigiissummik suliaqartigani”[1], taamalu allariarluni immikkoortortaqarfik naatsumik paasimasaminik nangitsilluni allappoq, kommunip Nunamut Namminermut Immikkoortortaqarfik ilisimatissimagaa allakkiaq 3. juli 2021-meersoq soraarnermut isumaqatigiissuteqarnermut ilaatinneqanngitsoq.

Eqqartuussissuserisup oqaaseqaatai kommunaldirektøritut peersinneqarsimasup, siunnersortitut suliffeqarfimmut kommuni sinnerlugu isumaqatigiissusiorsimaneranut tunngapput unnerluussissutinillu imaanaanngitsunik imaqarlutik, aamma oqaaseqaatai ima nalilersuinernik imaqarsimagunarlutik, sulisut isumaqatigiissusioqataasimasut atuuffimminnik annertuumik sumiginnaasimasut, suliffimmiillu soraarsitaanermik tamanna kinguneqarsinnaasoq.

Kinguneqartitsineq
Nunamut Namminermut Immikkoortortaqarfiup borgmesteriusimasoq nammineq eqqarsarsinnaanngitsutut naliliinnarnagu aamma sutigut kommunimut aningaasartuutissanik pisussaaffilersuisimaneranik ilisimasaqannginnerarpaat. Ilanngullugu Nunamut Namminermut Immikkoortortaqarfiup eqqarsaatigisimagunanngilaa misilittassallugu, borgmesteriusimasup kommunimut aningaasartuutissanik pisussaaffilersuinermini  kommunit aqunneqarnerat pillugu inatsit naapertorlugu ingerlatsisimanersoq, soorlu aningaasat “ajunngitsorsiassat” annertunaakkat tunniunneqannginnerini kommunalbestyrelsimut suliaq akuerisassanngorlugu tunniunneqarsimanersoq. Imaluunniit kommuni avaqqullugu partiit amerlanerussuteqartut akunnerminni isumaqatigiissuteqaannarsimanersut. Kingulleq atuussimappat Siumup paasinninnera naapertorlugu peqquserlunneq pineqarsimassaaq.

Qanorluunniit suliap naammassinissaata tungaanut Siumut qanimut malinnaaniarpoq, tassami pineqartumi assersuusiarineqarpoq, politikikkut amigartumik aqutsineq maannamut Sermersuummi najugaqartunut 1,25 milliardinik akeqartoq. Nunamut Namminermut Immikkoortortaqarfiup suliamut matuseriaraluarnera pineqartumut uniuerujussuaannarani aamma inatsisitigut tunngavilersukannerneqarsimasutulluunniit isikkoqanngilaq.


[1] https://sermitsiaq.ag/kl/kommunaldirektoriusimasumut-ajunngitsorsiassaqartitsineq-pillugu-naammagittaalliuut