Naak peqqinnissaqarfitsinnut ikiuutaasussamik iliuuseqartoqaraluartoq, maanna allannguuteqarfiginissaa avaqqunneqarsinnaajunnaarpoq, nakorsammi nunatsinni pisariaqartivissorpagut, taakkununngalu najugassaqartitsisinnaaneq aamma naapertuuttumik aaqqiivigineqartariaqarpoq.
All.: Doris J. Jensen, politikikkut oqaaseqartartoq
Piffissami kingullermi peqqinnissaqarfik artorsareertoq qaavatigut artorseqqinneqarpoq, atorfilittanut inissiat akisuallaarneri tunngaviulluni. Pissutsit taamatut ingerlaannassappata nakorsaqarniarnerput ajalusoorluinnassooq. Massakkoqqissaaq pineqarpoq nakorsaq immikkut ilinniagalik misilittagartooq nunatsinni atorfissaqartinneqarluinnartoq, kisianni pissutit taamaannerini eqqugaavoq allaat nunarput qimattariaqalerlugu.
Naluneqanngitsutut inissiat taakkua Inatsisartuni partiini tamani aningaasaqarnermut ataatsimiititaliami akuersissutigineqarnikuupput, maannalu ersarissivoq taamani aaliangiineq ajunngitsumik siunertaqaraluarluni pitsaanerpaanngitsoq inissiat akisuallaarneri pissutaalluni.
Taamaattumik ajornartorsiut ilungersunarluinnarmat, suleqatigiilluni immikkut iliuuseqarnissaq matumuuna kaammattuutigaara, tassa Inatsisartut aningaasaqarnermut ataatsimiititaliaat aammalu aningaasaqarnermut naalakkersuisoq aaqqiissutissamik nassaarniarnissaat siunertaralugu.