Takorlooruk kisimiittuullutit, inimut akiliiguit, kallerup innera akilerukku, nangit qaammammut 800 kr. sinnerlugit akilerukkit immaqalu immuit ilanngukkukkit il. il., taava inuussutissanut akiliutissatit qaammatip sinneranut naammanngilluinnarput. Taamaattumik isumaqatiginniarnissani erninermusiat immikkut isiginiarneqartariaqarluinnarput
All.: Doris J. Jensen, politikikkut oqaaseqartartoq
Nunatsinnigooq inuit ikippallaarpugut. Meeqqiorniartangooq amerliartorniassagatta. Kisianni!
Innuttaasut ilinniarsimanatik tiimimusiallit erninermusiaat appasinnerpaaq qiviaraanni inuussutissat naammanngilluinnarput ajornerpaamillu inissittoqaraangat erninermusiaqarnissaq periarfissaaneq ajorpoq.
Assersuutigilara nunatsinni innuttaasut ilarpassui ullunut 14-nut 1.500 kr-niinnarmik erninermusiaqartarput annerulaamik pissarsisartut 2.000 kr. sinnilaarlugu. Imaappoq erninermusiat assigiinngitsorujussuupput qaffasinnerpaamiik appasinnerpaamut.
Takorlooruk kisimiittuullutit, inimut akiliiguit, kallerup innera akilerukku, nangit qaammammut 800 kr. sinnerlugit akilerukkit immaqalu immuit ilanngukkukkit il. il., taava inuussutissanut akiliutissatit qaammatip sinneranut naammanngilluinnarput.
Atugassarititaasut taamaannerini, nunatsinni arnarpassuit ilungersuuteqarput. Meeraq inunngortoq pilluaataasussaavoq taamaattumik aningaasanut isumaqatiginniarnissani immikkut isiginiarneqartariaqarluinnarput nunatsinni erninermusiat. Isumaqarpunga taamaaliornikkut amerliartoqqilersinnaaneq ilaatigut aqqutissiorneqassasoq. Tassami inuuniarneq akisoreertoq tunuarsimaartoqartarmat meerartaarnissamut imminut artorsinnginnissaq pinerullugu, taamaattumillu ajoraluartumik naartuersittorpassuusarput.
Taamatut oqareerlunga, Siumumiit ilungersuutigeqaarput aammalu kissaatigeqaarput aningaasarsiorfissat nutaat suli annerujussuarmik ukkatarinissaat, pisuussutigut atorlugit. Taamaasiornikkut atugarissaarnerunissamut inoqatittalu pisariaqartitsisut pitsaanerusumik inuuniarnissaannut aqqutissiuussissagatta.