Naalakkersuisut tunumut qilalukkanik immikkut ittunik tunniussinerat iluatsissappat, taava pitsaasumik atuisunut tunniunneqartariaqarput

Qilalukkanik makitsinermi periuseqarneq pillugu siornaalli misilittarnikuuarput, taamaattup periuseqarnerup ajoraluartumik kingunerisarpaa pisassat tunniunneqartuugaluit tamakkiisumik pisarineqartannginnerannik. Taamaammat kaammattuutigissavara pisassanik paggatassiissutigineqarnerisigut qilalukkat tunniunneqassasut

All.: Mala Høy Kúko, Inatsisartunut ilaasortaq

Tassa nunarput ukiarpoq silalu aasatulli silagittuaannarunnaarpoq, silaannaq nillertoq nunatsinnut anngutereernikuuvoq. Taamaammat qullersaninngaanniit naatsorsuutigineqarsinnaajunnaartariaqarpoq angallatit sumorsuaq angalaarsinnaassasut aasatulli angalasarnerattulli. Aasaq angallatit silaginnerani sumorujussuaq pisinnaasarput aarlerissuteqarpiaratik.

Massakkut anorersuit takkuttalernikuupput tamatumalu malitsigisarpaa imartatta malissuarnik nassataqartinneqartarluni. Taamaammat paaseqqunarpoq ungasissuliartoqarsinnaajunnaarnikuuvoq sualummi Tasiilap eqqaa piterartarnera eqqarsaatigalugu.

Qilalukkanik makitsinermi periuseqarneq pillugu siornaalli misilittarnikuuarput, taamaattup periuseqarnerup ajoraluartumik kingunerisarpaa pisassat tunniunneqartuugaluit tamakkiisumik pisarineqartannginnerannik. Pisassat tamakkernissaannik siunertaqartoqarsimassappata naalakkersuisuniit periutsimik taama ittumik atuiniartoqarnera paasinarsinnaavoq. Siulianimi namminneq nalunngilluinnarpaat iluatsiffiusanngitsoq taamatut periuseqartoqartarneratigut.

Taamaammat kaammattuutigissavara pisassanik paggattassiissutigineqarnerisigut qilalukkat tunniunneqartussat. Tassuunakkut aatsaat isumannaarisinnaavugut pisassat amerlanerpaartaat pisarineqarnissaannik.