Nanortallip nunaqarfittai angallannikkut sumiginnarneqarput

All.: Anders Olsen, Inatsisartunut ilaasortaq

Angallanneq assartuussinerlu eqqarsaatigalugit kiffartuussinissamik isumaqatigiissut nutaaq ukioq manna ukiup aallartinneraniit atuutilerpoq. Kiffartuussinissamik isumaqatigiissut amerlasuunik pitsanngoriaatsinik imaqaraluartoq paasinarsivoq nunatta kujaterpiaani najugaqartuusut akuersaarneqarsinnaanngitsumik eqqornerlunneqartut.

Upernaaq paasinarsivoq Nanortallip kujataaniittut nunaqarfiit, tassalu Tasiusaq, Narsarmijit aammalu Aappilattoq qaammatini arlalinni angallassissutinik tikinneqarneq ajortut. Tamanna pillugu Angallannermut naalakkersuisoq uppernarsaassuteqarpoq nunaqarfiit pineqartut eqqarsaatigalugit ilungersunartumik inissisimasoqartoq, taamaammallu naalakkersuisoqarfik aaqqiissutissamik kingusinnerpaamik aggustip qaammataani saqqummiunneqartussamik ujartuinerarlugu.

Maanna kingumut takusinnaavarput Tasiusaq, Narsarmijit aammalu Aappilattoq angallassissutinit tikinneqassaaqqittut, aatsaallu novemberip naanerani tikinneqaqqittalernissaat takuneqarsinnaalluni.

Tamanna ajorluinnarpoq piaarnerpaamillu Naalakkersuisut iliuuseqartariaqarput nunaqarfiit pineqartut angallannikkut kiffartuunneqarnerat ataavartunngortinniarlugu.

Innuttaasut 300-t tungaanoortut pineqarput nunatsinni imartat navianarnersaattut taaneqarsinnaasumi najugaqartuusut. Taamaammat taqqavani innuttaasut angalasinnaanerannut periarfissaat piaarnerpaamik aaqqiissuteqarfigineqartariaqarpoq, tamannalu Naalakkersuisut qulakkeertariaqarpaat immikkut aningaasaliisariaqarnerit pissagaluarpataluunniit.

Ullumikkut Naalakkersuisup akisussaasup naqissuserlugu oqaatigaa aaqqiissuteqarnissaq eqqarsaatigalugu suli naammassinnittoqarsimanngitsoq, naak kingusinnerpaamik aggusti qaammat saqqummiunneqartussaq neriorsuutigisimagaluarlugu. Naalakkersuisut ajornartorsiut piaarnerpaamik iliuuseqarfigisariaqarpaat, nunattami kujaterpiaani najugaqartuusut allatuulli nunatsinni innuttaaqataapput pisinnaatitaaffeqarlutillu.