Imigassamik matusigallarnerit pillugit isummersortoqarlunilu oqallittoqarpoq, tamannalu ajunngissinnaavoq. Kisianni aaliangeriikkat tunngavilersorluakkanillu saqqummiunneqareersut apeqqusersorunnaarlugit qineqqusaarutigiunnaarlugillu partiinullu pisuutitsiniutigiunnaarlugit immitsinnut qivialaariarta, aperaluta meeqqat pillugit oqallinnissarput pingaarnerunnginnersoq
All.: Doris J. Jensen, Inatsisartunut ilasortaq, Siumut
Meeqqanut kinguaassiuutikkut atornerluisarneq soorunami Siumup akuersaanngilluinnarpaa, taamaattumik ukiuni kingullerni Siumut siuttuutillugu atornerluisarneq akiorniarlugu suliniut KILLILIISA ukioq manna 2022-mi naammassisussaq ineriartorteqqissallugu pingaaruteqarluinnartoq Siumut isumaqarpoq. Tassami suliniut KILLILIISA aqqutigalugu paasisitsiniaaneq ingerlaqqittariaqarpoq.
Kinguaassiuutitigut atornerluisarneq akiussagutsigu aanngajaarniutinik atornerluinerujussuaq suli annertunerusumik akiorniartariaqarparput, politiit ukiumoortumik nalunaarusiaanni takuneqarsinnaammat amerlanerpaat imigassamik atuisimatillutik kinguaassiutitigut atornerluisarnerit pisartut. Taamaattumik katsorsaaviit ilaqutariinnut ingerlatsiffiusut sinerissami inerisarneqartariaqarput.
Kinguaassiuutitigut atornerluisartut katsorsarneqarsinnaanngippata qinikkat ammasumik oqallittariaqarput, isummerfigisariaqalerparput atornerluisartut pineqaatissiinnarnagit allatut qanoq iliuuseqarfigineqarsinnaanersut. Tassami eqqartuussiveqarnermi nalunaarusiat takutittarpaat, inuit taakkua pinerluutiminnik utikajaartuusut.
Eqqaamaneqassaarli akisussaanerpaat tassaammata angajoqqaat akisussaasut. Misissuinerit takutippaat meeqqanik tukkutitsinermi amerlasuut atornerlunneqartartut, ajornartorsiut aamma uaniippoq meeqqat kinguaassiuutitigut atornerlunneqarsimasut ajoraluartumik amerlasuutigut uppernarsaatissaqarneq ajortut. Taamaattumik angajoqqaatut tamatta akisussaaffigaarput meerartagut sapinngisamik oqaaqqissaartassallugit ajortumik pisoqartillugu erngertumik tatigisaminnut oqaatiginnittassasut.
Inuiaqatigiinni imigassamik tuniniaanerit matuneqarallarnerat pillugit assut isummersortoqarlunilu oqallittoqarpoq, soorunami tamanna immini ajunngissinnaavoq. Kisianni aaliangeriikkat tunngavilersorluakkanillu saqqummiunneqareersut apeqqusersorunnaarlugit qineqqusaarutigiunnaarlugillu partiinullu pisuutitsiniutigiunnaarlugit immitsinnut qivialaariarta, aperaluta meeqqat pillugit oqallinnissarput pingaarnerunnginnersoq.
Inatsisartut ukiaq 2021 ataatsimiimmata pineqaatissiisarnerup sivitsorneqarnissaanik suliap ingerlasup piaartumik naammassineqarnissaa Siumup suleqataaffigissavaa.