Qanittukkut Inuit ataqatigiit Atassummik suleqateqarunnaarnertik nalunaarutigaat, tamanna Atassutip ataatsimiititaliami siulittaassuffimminik naammaginanngitsumik ingerlatsisimanera ilaatigut toqqammavilersuutigineqarluni
All.: Anders Olsen, Kujallermi kommunalbestyrelsimut aamma Inatsisartunut ilaasortaq, Siumut
Siumumit taamatut nalilersuisimaneq paasilluarsinnaavarput, taamaattorli kommunalbestyrelsimi ataatsimiititaliani amerlanerpaani sulineq minnerusumik annerusumilluunniit taamatut ingerlasimasoq oqaatigisinnaavarput, uani Inuit ataqatigiit siulittaasuuffii aamma eqqarsaatigalugit.
Siumumit arlaleriarujussuarluta ataatsimiititaliani siulittaasut ingerlatsineri naammaginannginnerarlugit uparuartarnikuuagut, ilaatigut kommunalbestyrelsip ukiarmi ataatsimiinnerini qaqilertarlugit. Ilaatigummi allaat ataatsimiinnermiit imaqarniliaasimasut atsiorneqarsinnaaneq ajorsimapput aammalu naliginnaalersimalluni ataatsimiititaliani ataatsimiissutissat piffissaq kingullerpaaq atorlugu aatsaat ilaasortanut agguaanneqartarnerat, taamaammat illuinnaasiorpallaarujussuarpoq Atassutip ingerlatsinerlunnera kisiat matumani uparuassallugu.
Qinigaaffiup aallartinneraniit kommunalbestyrelsimi oqaluuserisassat kingusinaarlutik nassiunneqarsimasut aamma nalaanneqarnikuupput, ilaatigut oqaluuserisassat pitsaasumik naammassineqarsimannginneri pissutaallutik oqaluuserisassaagaluit ataasiakkaat kingusinnerusukkut aatsaat oqaluuserineqartariaqalertarlutik. Assersuutitut taaneqarsinnaavoq 2022-imut missingersuusiornissamut siullermeerinninnissaq oqaluuserisassani ilaareersoq kinguartinneqartariaqarsimavoq aamma , oqaluuserisassap piareersimannginnera pissutaalluni.
Taamaammat Siumut isumaa naapertorlugu Inuit ataqatigiit suleqatigisimasaminnut kisiat pisuutitsiniarnera inissaminiinngilluinnarpoq – unneqqarissumilli ingerlatsineq amerlasuutigut pitsaanngitsoq ingerlatartik innuttaasunut suaarutigisariaqaraluarpaat.