Innuttaasut nilliaateqartut qatangiinnarlugillusooq, qangaaniilli saaffiginnissutigineqartut uteqqiallugit naalakkersuisuusimasut pisuutiinnarlugit ingerlaneq naammaginanngilaq. Taamaattumik ilungersunartumik inissisimanitsinni aaqqiissutissanik ujartuivunga
All.: Dorthe-Marie Mogensen-Fontain, Sermersuummi Kommunalbestyrelsimi ilaasortaq
Inissaaleqineq Paamiuni aamma atuuppoq, assiliaatit salluliuutaasinnaanngillat.
Inissaaleqineq arlalitsigut maani aamma ajornartorsiutaavoq. Ini A/S inissianik neqeroorsinnaanani inissiat isaterneqartussat pillugit inuit nutserartinneqarnissaat inissianut allanut neqeroornissaat siulliunneqarnissaa maanna sulissutigineqarpoq.
Ilaqutariinnillu assigiinngitsunut eqquinerluppoq tamanna.
Inissarsiorlutik ilaat ukiut sisamat utaqqipput, inissianik mikinerusunik neqeroortoqarnissaa utaqqillugu.
Ilaat meeqqaminnik arsaarneqarnissaminnik Kommunimit siorasaarneqartut sumiiffissaqannginnertik pillugu.
Taassumalu saniatigut kommune angerlarsimaffeqanngitsunut inissiigallarfissamik peqanngillat maani Paamiuni.
Ajornartorsiullu Kommunimi ataatsimiisitaliami qaqinneqaraluarmalluunniit tusaajumaneqarani, aalajangiussaasut kisiisa tunniunneqartarput. Tassa ukioq manna aningaasatigut isumaqatigiissummi anguneqartoq illut illorput 2000 sanaartorneqarnissaanut aningaasaliissutaasut aatsaat ukioq manna ukiullu tulliuttut sanaartorneqartussat.
Innuttaasut nilliaateqartut qatangiinnarlugillusooq, qangaaniilli saaffiginnissutigineqartut uteqqiallugit naalakkersuisuusimasut pisuutiinnarlugit ingerlaneq naammaginanngilaq.
Maanna ilissi naalakkersuisuususi assiliaatissat (blokit isaterneqartussat) pillugit iliuuseqarnissassinnik noqqaavunga.
Assiliaatinik pilersitsineq assigiinngitsorpassuartigut aallaaveqarpoq, maannamullu assiliaataasimasut arlallit piiaarneqalereersimapput. Nutaanillu illuliassanik tallimanik sanaartortoqarnissaa siunniunneqarnikuusoq qatangiinnarsimavoq.
Aamma inuerussaaneq annertooq kommunerujussuanngornerup kingunerisaanik pilersimavoq, allaat ilaqutariit arlariit Nuummut nuutsinneqarlutik kommunimi suliffitsik aallaavigalugu annaannginnissaanut iliuuseqartinneqarsimallutik. Taamaattumik pissutsit assigiinngitsut uani ullumikkut killiffigisatsinni ilungersunartumik inissisimanitsinni aaqqiissutissanik ujartuivunga.
Inissianik neqeroornissamut ammaaqqinnissaq piaartumik pissasoq noqqaassutigerusuppara. Inuuniarnikkut pitsaasumik innuttaasunut atugassaqarnissaannik anguniagaqarpugut tamatta. Uanilu neqeroorsinnaaneq ammaassiffigineqarnissaa aaqqissuussaasumik allanngortinneqartariaqarpoq, tassa nutserartitsineq ingerlanneqarnerata saniatigut innuttaasunut neqerooruteqarsinnaaneq aamma ammasinnaasariaqarpoq.
Assiliaatissat (blokit isaterneqartussat) pillugit innuttaasut neqeroorfigineqarsinnaannginnerat pinnagu, ataqatigiissumik ingerlatsisinnaaneq ujartuiffigisariaqarpoq.
Innuttaasunit arlaqartunit saaffiginnissutit tunngavigalugit taamatut allagaqarpunga, aaqqiissutissamillu ujartuillunga, neriuutigaaralu akissuteqarfigineqassallunga.