Meeqqat atuarfiat

Meeqqat pitsaanerpaamik ilinniartinneqassapput — atuarfik angerlarsimaffillu suleqatigiinnerisigut, kulturerput tunngavigalugu, tamanut assigiimmik periarfissiissuteqarfiusumik.

Meeqqat angusarissaarnissaat atuarfiup angerlarsimaffiullu suleqatigiilluarnerisigut anguneqassaaq, taamaattumik angerlarsimaffiup atuarfiullu suleqatigiinnerat nukittorsartuarneqassaaq.

Meeqqat atuarfianni ilinniartitsisut pitsaanerpaanik tunngavissaqarnissaat atortussaqarnissaallu qulakkeerneqarsimassaaq, meeqqavut pitsaanerpaamik ilinniartinneqaqqullugit. Tamatumunngalu ilanngullugu atuarfiit pisortaasa meeqqat atuarfiini ilinniartitaanermut eqaatsumut ataqatigiittumillu naleqqussaanermut atatillugu pikkorissartinneqartarnissaat periarfissaajuassaaq.

Meeqqat atuarfianni angajullernut ilinniarfissanik siunnersuineq annertusarneqarlunilu ataavartumik pitsanngorsarneqassaaq. Meeqqat atuarfiat qimanneqartassanngilaq ingerlaqqiffissaqanngikkaanni. Ingerlariaqqinnissaminnut pilersaarusioreersimanngitsut tamarmik malinnaaffigineqassapput, ukiullu ataatsip iluani pilersaarusioqatigineqassapput qanoq ingerlariaqqinnissaat pillugu. Innuttaasut tamaviisa nunatta ineriartortinneqarnerani peqataanissaat pisinnaatitaaffiullunilu pisussaaffiummat, tamat kivitseqataanissaat qulakkeerneqartariaqartoq Siumut isumaqarpoq.

Meeqqat atuarfianni ilinniartitsisussaqarneq anguniarlugu Ilinniartitaanermut Aqutsisoqarfik Ilinniarfissuarlu suleqatigiilluinnartariaqarput. Najugarisami ilinniartitsisunngorniartarneq annertusarneqartariaqarpoq. TV, radio internetilu ilinniartitaanermut tapertaralugit alimasissumik atuartitsineq ingerlanneqartassaaq. Ilinniartitsisut ilinniarsimasut nunaqarfinni amigaataasarnerat aaqqiiviginiarlugu Siumup anguniagaraa naleqquttunik inissaqartitsisarnissaq.

Kulturerput kinaassuserpullu aallaavigalugu atuartitsineq immikkut ilisimasallit atorluarnerisigut ingerlanneqassaaq. Inuiattut ileqqugut nerisagullu ilinniartitsissutigineqarsinnaanissaat siuarsarneqassaaq, meeqqat atuarfiini ilisimasanik avitseqateqartarnikkut.

Meeqqat atuarfii tamarmik ullutsinnut naleqquttunik atortutigut periarfissaqartitaajuarnissaat qulakkeersimaneqassaaq aamma ersinngitsumik allatigulluunniit inuit innarluutillit meeqqat atuarfianni meeraqatitik assigalugit atuarnissaminnut sutigut tamatigut periarfissaqartinneqassapput.

Meeqqat atuarfianni ingerlaaseq nalilersoqqissaarneqartariaqarpoq, aamma tuluttut oqaatsit allamiut oqaasiisut salliutinneqarlutik ilinniartitsissutigineqartalissasut Siumut isumaqarpoq.

Aalisarneq nunatta nappatigaa, taamaattumik meeqqat atuarfiani nunatta pissarititai qanorlu iluanaarutaasinnaanerat atuartitsinermi ilaalersinneqartariaqartut Siumut isumaqarpoq. Siumup anguniarpaa Naalagaaffiit Peqatigiit (UN) meeqqat pisinnaatitaaffiinik oqariartuuteqartarnerat, atuarfinni pinngitsoorani atuartitsissutigineqartassasoq.