Meeqqat tamarmik ullutsinni naleqquttumik ulluunerani paaqqinnittarfeqarnissaat Siumup anguniagaraa, tamannalu illoqarfinnut nunaqarfinnullu assigiimmik atuuppoq.
Meeqqeriviit meeqqat avatangiisaannut, kulturitsinnut, ilinniartitaanermullu naapertuuttuussapput. Meeqqeriviit timikkut tarnikkullu peqqissuunissaq siunertaralugu perorsaaffiussapput.
Meeraaqqerivinni meeqqerivinilu tamani siunertat anguniakkallu ersarissut pilersinneqassapput, taamatullu akisussaaffiit pisussaaffiillu ersarissut pilersinneqassallutik. Meeqqerivinnik ingerlatsinermi nakkutilliineq Namminersorlutik Oqartussanit ingerlanneqartoq pitsanngorsarneqassaaq aaqqissuuteqqinneqarlunilu Meeqqeriviit meeqqallu atuarfii imminnut ataqatigiilluassapput, aaqqissuulluagaasumillu angajoqqaat qanimut suleqatigineqassapput.
Kalaallit kulturerput aallaavigalugu meeqqerivinni perorsaaneq ingerlanneqassaaq. Meeqqerivinni tuluttut oqalunnermut sungiusarnerit aallartittariaqarput.