Marius Olsenimut eqqaaniut

Ikinnguterput ataqqinartoq aalisartoq piniartorlu Marius Olsenip 75-inik ukioqarluni 28. februar 2022 SANAmi toqukkut qimaguppoq.

Maariusi annertoorujussuarmik aammalu ukiorpassuarni inuiaqatigiinni sullissilluarsimavoq. Illoqarfigisamini Sisimiuniinnaanngitsoq kisiannili nunaqarfinni aammalu nuna tamakkerlugu inuiaqatigiinni sulilluarsimavoq, taamaattumillu ilisarisimasarpassuaqarlunilu. Maariusillu pingaartilluinnarsimavaa aalisartut piniartullu atugaasa pitsanngorsarnissaat sukataarutigissallugu, tamakkulu pillugit ersarissumik toqqaannartumik ilaatigut sakkortuumik oqarsinnaasarnini ilisarnaataasa ilagalugit, pissutsit piviusut eqqortussarlu anguniarlugit.

Aalisartorpassuit piniartorpassuillu annertuumik perorsaaqataaffigalugit siunnersortaaffigalugillu toqussi tikillugu suliuarsimavoq aammalu peqatigiiffilerineq kattuffilerinerlu annertuumik suleqataaffigisimallugit.

Maariusilu misileerusuttartuugami eqqaminni eqalunnut uumatitsivimmik annikikkaluamik pilersitsivoq. Taamaasiornikkut eqalunnik nutaarluinnarnik pisisoqarsinnaanera, pisisartup nutaarluinnarmik aammalu nammineq uumasoq suli pisiassani tikkuarlugu pisiarisinnaanngortikkumallugu pilersitsivigalugu. Ajoraluartumilli Namminersornerullutik Oqartussanit tamanna unitsinneqarpoq. Taamaaliornissarooq inerteqqutaammat aammalu nunatsinnut tulluanngitsutut nalilersorneqarluni, uffalu nutaartugassanik imminullu pilersornissamut aqqutissanut siunertaqartumik suliniut pitsaalluinnartoq ingerlanneqaraluartoq. Taamaattumik Siumup tungaaniit aqqutissanik Maariusip anersaava tikkuussineralu aallaavigalugu pilersitsinnaanissanut sulissuteqassaagut.

Maariusip suliniutaasa siuttuuffigisimasaasa ilagaat Sarfannguani Timersortarfeeraliornissaq, massakkut sanaartorneqarluni ingerlanneqaleruttortoq.

Aammattaaq Sisimiunilu umiatsiaararsortut puttasoqarnikkut atugaat pitsanngorsarniarlugit, Maariusip isummat aallarnigaasa ilagaat amutsiviup eqqaani puttasunik aalisartut piniartullu namminneq aqutaminnik pilersitsisoqarnissaa.

Maariusip suliarpassuisa ilagaattaaq nappaassuarmik kræftimik eqqugaasimasut ikiorneqarnissaat. Taamaattumillu Neriuffik-mi aamma suleqataalluarsimalluni.

Maariusi Siumut Sisimiuni ukiut arlallit suleqataavoq aammalu ataqqinaammik ilaasortaalluni. Siumullu nuna tamakkerlugu Sisimiuni 2017-imi ataatsimeersuartoqarnerani Siumup nersornaasiuttagaanik tunineqarluni.

Meeqqami sunngiffimmi pitsaasumik suliaqarnissaat nulianilu Nukaaraq annertuumik perorsaassutigivaat. Tamannalu aamma kinguaaminnut ernguttaminnullu kiisalu ilaquttaminut ingerlateqqippaat, ilaqutariinni aalisarnermik piniarnermillu ingerlanneqarneranik, mamarluinnartunillu pilisarnerit qulakkeerinneqataaffigalugit.

Maariusi qanilaartuuvoq, inoqatiminut ilaquttaminut asannittuulluni, minnerunngitsumik ernuttaminut perujulaartarnera qiimmassaasarneralu eqqaamaneqaatissaanut ilaalluinnarput.

Maariusi Sisimiut Kommuniani kingornalu Qeqqata Kommuniani kommunalbestyrelsimi ilaasortaavoq, ataatsimiisitaliamilu siulittaasutut sulilluarsimalluni. Kiisalu aamma Qeqqata Kommuniani 1. Viceborgmesteritut inissisimasarluni. Tamatumap saniatigut aamma Inatsisartuni (Lars Emil Johansen-imut) kingoraartaasunut ilaasimalluni.

Marius Olsenip qitornai, erngutai, erngutaqqiutai, qatanngutai ilaqutaasullu tamaasa Siumut sinnerlugu misiginneqatigingaarpagut.

Maariusip eqqaaneqarnera ataqqinartuuli.

Inussiarnersumik inuulluaqqusilluta

Erik Jensen, Siumup siulitaasua aamma Hermann Berthelsen, borgmesteriusimasoq