Ataatsimiititaliarsuup suliaa inatsisiliornissamut tunngaviliissaaq

Ukiorpassuanngulersuni aalisarnermut inatsit nutartigassanngorlunilu naleqqussarneqartussaq nalilersoqattaarneqartarsimavoq. Siumut isumaqarpoq, Inatsisartuni politikikkut isummernissaq tullinnguuttoq kinguarsaqqinneqartariaqanngitsorlu

All.: Karl Tobiassen, Inatsisartunut ilaasortaq, Siumut

Aalisarnermut Naalakkersuisoq KNR-ikkut marsip 1-iani oqartinneqarpoq, Aalisarneq pillugu Ataatsimiititaliarsuup suliaa inatsisiliornissamut tunngavigissallugu naammanngitsoq. Taamak oqariartornera Siumumit toqqissisimanartinngilarput.

Pineqarsimaguni tusarniagassat tamarmik suli tusarniaavigineqarsimanngitsut, tamanna tunngavilersuutitut paasilluarsinnaavarput. KNR-imili Naalakkersuisup oqariartuutaa ima sammiveqarpasippoq, ataatsimiititaliarsuup suliaa immini ingerlaqqinnissamut tunngavigissallugu naammanngitsoq.

Oqariartuut tamanna assut tupinnarpoq. Ataatsimiititaliarsuaq qanorluunniit naammassisaqarsimagaluaruni tamatta iluarisatsinnik suliaqarsimasinnaanngilaq. Ineriikkamik akueriinnagassamillu Inatsisartunut tunniussaqarsinnaanngilaq, aamma Ataatsimiititaliarsuup suliai tunngavigalugit Naalakkersuisut akueriinnagassamik Inatsisartunut tunniussaqarnissaminnik ilisimasuuteqarsimassagunik tupinnassaaq.

Aalisarneq pillugu Ataatsimiititaliarsuup suliaa Inatsisartuni qinikkat akornanni isummersorfigineqarluni inatsisissatut ilusilersorneqartussaavoq. Siumumilu naatsorsuutigaarput, Naalakkersuisut pilersaarutertik naapertorlugu piareersakkaminnik Inatsisartut upernaakkut 2023-imi ataatsimiinneranni saqqummiussaqarumaartut.

Taamanikkussamut naatsorsuutigissavarputtaaq, tusarniaavigineqartussat tamarmik torersumik pissusissamisoortumillu tusarniaavigineqarsimassasut.