Kangaatsiami nunaqarfiinilu angallanneq aaqqiiffigisariaqarpoq

Kangaatsiami nunaqarfiinilu angallannikkut pitsaasumik atugassaqartitsinissaq aaqqiissuteqarnissarlu pisariaqalerpoq. Inuussutissat pisiniarfinni maanna nungutsiterput

All.: Otto Jeremiassen aamma Aqqa Samuelsen, Kommune Qeqertalimmi kommunalbestyrelsimi Siumut sinnerlugu ilaasortat

Taamaattumik Kangaatsiami nunaqarfiinilu ukiuunerani angallannikkut pissutsit ilungersunarluinnartut aaqqiissuteqarniarfigeqqullugit Siumut gruppia sinnerlugu borgmesterimut aammalu kommunalbestyrelsimut allagaqaateqarpugut. Kommune Qeqertalimmi borgmesteri aammalu kommunalbestyrelse tamarmiusoq Kangaatsiami nunaqarfiinilu ukiukkut angallanneq pillugu aaqqiisoqarnissaanik Air Greenlandimut, Namminersorlutik Oqartussanut Naalakkersuisunullu ataatsimoorussamik iliuuseqaqqusillutik oqariartuuteqartariaqarput.

Kangaatsiami nunaqarfiinilu angallannikkut pissutsit ulluni makkunani ajorluinnarput. Nioqqutissat innuttaasut pisariaqartitaat naatitat, immunnik tunisassiat, inuussutissallillu allat pisiniarfinni nungutsiterput. Kangaatsiami nunaqarfiinilu angallannikkut pissutsit kipiluttunarnerujussuisa kingunerisaanik nioqqutissanik nutaanik inuussutissalinnik pissarsisinnaaneq ajornarsilluinnartoq akuerineqarsinnaanngilaq. Borgmesterimut kommunalbestyrelsimullu allagaqarluta ernumassuteqarnerput avammut nalunaaruteqarnitsigut oqariartuutigaarput.

Innuttaasut Kangaatsiami nunaqarfiinilu angallannikkut imaannaanngitsumik sussaanngitsumillu atugaqartinneqarnerat paasilluarsinnaavarput. Angalaniarnermi kinguaattooqattaarnerpassuit ullorpassuarni utaqqisariaqarnermik kinguneqartut akueriinnarneqarsinnaajunnaarput. Aammalu allakkat, akiligassat poortukkallu nassiussat Kangaatsiamut nunaqarfiinullu nassiussat ullorpassuarni ingerlariaqqissinnaajunnaaqqapput. Allakkat, akiligassat poortukkallu nassiussat piaartumik apuuffissaannut apuunneqassasut piumasarerusupparput.

Kommune Qeqertalimmi borgmesteri aammalu kommunalbestyrelse tamarmiusoq Kangaatsiami nunaqarfiinilu angallannikkut pissutsit ilungersunarluinnartut pillugit ataatsimoorussamik aaqqiissutissanik oqariartuuteqarnissamut piumassuseqartariaqarput. Kangaatsiami angallannikkut pissutsit taamaattussaannartut isigineqalersimasut allanngortinniarlugit kommuni, Air Greenland, Namminersorlutik Oqartussat Naalakkersuisullu akornanni oqaloqatigiinnerit iliuuseqarnerillu aallartinneqartariaqarput.

Kangaatsiami nunaqarfiinilu angallannikkut pissutsit taama ilungersunartigineri isiginngitsuusaarsinnaanngilarput, ataatsimoorussamillu iliuuseqartoqarnissaanik aaqqiisoqarnissaanillu ujartuilluta.