Kommuneqarfik Sermersuummi missingersuutit pillugit isumaqatigiissummi Siumut peqataasoq

Sisamanngornerup oktobarip 28-ani 2021-ip unnuaanut Siumut Kommuneqarfik Sermersuumi kommunalbestyrelsi amerlanerussuteqartoq peqatigalugu missingersuutinut isumaqatigiissummut atsioqataavoq. Taamaasilluni partiip ukiuni sisamani tulliuttuni ineriartornerup sammivianut tikkuusseqataavoq. Innuttaasut qiteralugit ineriartortitsisoqarnissaa isumaqatigiissummi qitiutillugu ingerlatsisoqassaaq. Takuuk isumaqatigiissut uani.

– Kommunalbestyrelsi nutaaq maajip sisamaani ukioq manna ivertinneqarmalli Siumup siunnersuutai arlallit kommunalbestyrelsimiit tamarmiusumit akuersissutigineqarput. Taamatuttaaq Siumup gruppia illuatungiliuttutut eqisimaarluni kukkussutit amigaatillu kisimik tikkuartortanngilai, kisiannili kommunip qaangerniagassaannut aaqqiissutissanut nassaarniaqataasarpoq, taamatut oqarpoq Inga Dora G. Markussen, taannalu Siumup gruppiani arfinilinnik ilaasortaqartumi gruppimi siulittaasunngoqqammerpoq.

Inissiat nalinginnaasut
Partiit isumaqatigiinniartut isumaqatigiinniarnermi aallaaviusup annersaa isumaqatigiissutigaat, taamaattoq immikkuualuttunik aaqqinneqartariaqartunik kanaajagassanik ilaqarput.

– Uagutsinnut nuannerpoq takullugu pingaartitavut amerlasuut isumaqatigiissummut ilanngunneqarsinnaammata. Pisortani sullissinerup pitsaanerulernissaa, nunaqarfinni illut sullivinni akit appasinnerulernissaat, atornerluinermik ajornartorsiuteqartut katsorsarneqartarnerisa periarfissaasa pitsanngorsarnissaat, pinaveersaartitsinermi iliuutsit pitsaanerulernissaat aammalu inuit innarluuteqartut pitsaanerusumik sullinneqalernissaat suliassaqarfinni iliuuseqarfigineqartussat eqqaaneqarsinnaasut ilagiinnarpaat. Taamaattoq suliassaqarfik ataaseq isumaqatigiissummut peqataanissatsinnut aalajangiisuuvoq, gruppimi siulittaasoq oqarpoq nangillunilu:

– Immikkoortoq Siumup isumaqatigiissummut peqataanissaanut aalajangiisoq tassaavoq sanaartornermi inissianik nalinginnaasunik – Nuummi, Tasiilami, Paamiuni Ittoqqortoormiinilu – inissialiornissap qulakkeerneqarnissaa isumaqatigiissummut ilanngunnera. Aappaattut Sanaartornermi Siunnersuisoqatigiinnik sanaartornermi ineqarnermilu soqutigisaqartut peqataaffigisaannik pilersitsisoqarneratigut iluaqutissat misissorneqarnissaat pineqarpoq, tassanilu kommunimi ineqarnerup tungaatigut pitsaanerusunik aaqqiissutissanik nassaarnissaq ujartorneqassasoq, oqarpoq Inga Dora G. Markussen.

Sunniuteqarnissaq kissaatigineqarpoq
Ukiuni arlaqalersuni aatsaat Siumut Kommuneqarfik Sermersuumi missingersuutinut isumaqatigiissuteqarnermi peqataavoq. Taamaasilluni Siumut akisussaaqataalerput ukiuni tulliuttuni iliuuserineqartussanut aammalu qulakkeerinneqataalluni suliniutit pingaaruteqartut piviusunngortinniarnissaannut.

– Isumaqatigiinniarnermi soorunami naaperiaanissaq pisariaqarpoq aammalu kommunalbestyrelsip inuttalersugaanerata kingunerisaanik isummat pingaarnersiuinerillu assigiinnginnerat ataqqissallugu. Kommunalbestyrelsimi peqataanitsinni qulakkeerusussimavarput pingaartillugit suliniutitta amerlanersaasa timitalerneqarnissaat.

– Anguniakkatta amerlasuut pitsaasut innuttaasunut iluaqutaalerlutik pivisunngortinneqarnissaat anguniarlugu pimoorussilluta sulissaagut aammalu aningaasat taakku missingersuutini innuttaasunut iluaqutinngorlutik aningaasaliissutigineqarnissaasa qulakkeerniarnissaat. Taamatullu ineqarfinni tamani inuussutissarsiornikkut ineriartortitsinissamut sinaakkutit pitsaanerpaat pilersinniarlugit ilungersorluta sulissaagut. Qilanaarpugut sulinerup matuma pingaaruteqartup nanginnissaanut, Inga Dora G. Markussen naggasiilluni oqarpoq.