Qilalugarniarneq makitsinikkut ingerlanneqassanngilaq

Qilalukkat kangerluit pulaffigisartagaat sikuarnikuupput, qularnartorujussuulluni pisassaritinneqartussat makitsinikkut pineqarpata pisarineqassanersut. Kaammattuutigissavarput naalakkersuisut aalajangernertik allanngortissagaat, qilalukkat piniartunut paggatassiissuteqarnikkut pisarineqartussanngorlugit

All.: Eli Kuitse aamma Lund Kúko, Siumut Tasiilaq

Tasiilami Siumumit nuannaarutigaarput Tasiilamut qilalukkanik 15-inik immikkut Naalakkersuisut tunisinerat. Piniartutummi ilaqutariittut neqissaqarniarneq eqqarsaatigalugu kiisalu mattattaanik ukiumut nerisaqarnissamik isumannaarinissaq pingaartikkatsigu. Tassa innuttaasut kulturimik ingerlatsineq suliamut pingaartitsinermik ingerlatsinerat ersarissorujussuuvoq, Tasiilap eqqaamiuannit.

Ajoraluartumilli pisassiissutigineqartussat makitsinikkut ingerlanneqarnissaat misilittakkagut maani nammineq innuttaaqataasutut malinnaaffiginikuusarput qivianngiivillugu qullersaniit aalajangereersimavaat.

Oqaluttuarisaanitsinni uagut Tasiilap eqqaamiuusugut qilalukkanik allanillu piniagassanik nunguutsinikuunngisaannarsimavugut. Tassami inuussutissatsinnik qaangiilluta qangarsuaaniilli ingerlatarput siulitta ileqqorisimasaa nanginnikuugatsigu. Tassa piniagassat namminneq pinngortitap illersormagit killilersorneqareeramik.

Massakkut silap immallu atoruminarnera allarujussuuvoq. Massakkut qilalukkat kangerluit pulaffigisartagaat sikuarnikuupput taamaammat qularnartorujussuuvoq qilalukkat pisassaritinneqartussat makitsinikkut pineqarpata pisarineqassanersut. Aammami siuliani tunisisarninni pisassat pisarineqanngitsoortarmata makitsisimanerup kingunerisaanik.

Taamaammat Tasiilamiit Siumumit isumaqarpugut taamatut pissusilersortarneq innuttaasut pisinnaaffigisaat piniartut peqatigiiffiisa akulerussinnaanerat kiisalu kommunit pisinnaatitsisinnaanerat qulangerlugu aalajangiisarnerat unitsinneqarluinnartariaqartoq.

Kommunimi innuttaasunut qanimut suliniartuummata taakku ilisimaarilluinnarpaat innuttaasut suut atorfissaqartinneraat. Sualummi piniarnerup silarsuaa eqqarsaatigalugu.

Taamaammat kaammattuutigissavarput naalakkersuisunit massakkut aalajangerneq allanngortinneqassasoq, qilalukkat piniartunut paggatassiissuteqarnikkut pisarineqartussanngorlugit. Inatsisartunimi aamma ilaasortaasut Tasiilameersut tamarmiullutik taamaaliornissaq oqariartuutigimmassuk.