Kommune Qeqertalimmi imigassamik matusigallarnermut kommunalbestyrelsimi Siumut gruppia akuerseqataanngilaq. Nipputtartulersuiinnarluni sulineq akuerinngilarput. Ajornartorsiutit matoorniaannarlugit killilersuinerit matoorinerillu naammagiinnarneqarsinnaanngillat
All.: Aqqa Samuelsen, Kommune Qeqertalimmi Siumut gruppiani siulittaasoq
Aatsaat ajornartoorfiup nalaani ajornartorsiutit matoorniaannarlugit killilersuinerit inuiaqatigiinnik
nukittunerulersitsinavianngillat. Imigassaq matugaluaraangalluunniit perulluliornerit, sakkortusaarnerit, aqqusinermi eqqissiviilliortitsinerit meeqqanillu kinguaassiuutitigut atornerluisarnerit ingerlaannarsinnaasarput. Taamaammat ajornartorsiutinut pilersartunut imigassaq kisimi pisuutinneqarsinnaanngilaq.
Imigassap matugallarneratigut inuit ilaat illoqarfimmiit illoqarfimmut angalanerulersinnaanerat ammaanneqarpoq, tassanilu aamma piffissami matumani imarluttartillugu navialinerit mianersuaalliornerillu pisinnaallutik.
Imigassap matugallarneratigut inuit ilaat aanngajaarniutinut allanut aammalu aningaasanoorajunnernut il.il. saannissaat Siumumit ernumassutigaarput.
Tassuunakkut meeqqat aamma eqqugaasinnaapput sumiginnarneqarsinnaallutillu.
Aanngajaarniutit allat aningaasanoorajunnerit il.il. imigassap matugallarnerata kinguneranik annertunerusumik pinaveersaartinneqarnissaannut pilersaarutinik malitseqartitsisoqanngilaq.
Taamaammat Siumumit siunissamut isigisumik ataavarnerusumik aaqqissuulluagaanerusumillu
aaqqiisoqarnissaa ujartorparput.
Covid-19-ip siammatsaaliniarneranut tunngatillugu imigassamik matooraanerit tunngavissaanngilluinnarput.
Uungaaraq aqaguinnarmullu isigaluni imigassamik matusigallarnermi imigassartorpallaartarnerit ajornartorsiutillu iluarsineqarsinnaanngillat. Siunissamut isigisumik aaqqiissummik pilersaaruteqanngikkaanni imigassap ammaqqinneqarnerata kingorna imigassartorpallaartarnerit kingumut annertuseriaannarlutik ingerlaqqissinnaapput.