Qaammat januaari aallartippoq coronamut tunillatsittut kisitsisaat qaffakkaluttuinnarlutik, maannamullu napparsimmavinni uninngasut toqusartullu suli amerliartorput
Allattoq: Kirstine Olsen, Qeqqata Kommuniani kommunalbestyrelsimut ilaasortaq, Siumut
Januaarip 17-iani Naalakkersuisut tusagassiortunik katersortitsimmata paasissutissiissutigineqarpoq nukiit coronamut testerinermut atorunnaarlugit napparsimasunut akiuussutissamillu kapuuinernut atorneqassasut. Paasissutissiinermi killilersuutit allannguutaat aammalu inuiaqatigiinnut maleruaqqusat saqqummiunneqanngillat. Ulloq taanna aallarnerfigalugu coronamik eqqorneqartut coronarlutik imminnut nalunaarutigisalerput, illoqatigiillu iluanni coronartoqarsimappat sinneri coronamut ersiuteqanngitsut suliartorlutillu meeqqaniititsisinnaalerput aammalu atuartut atuarsinnaanngorlutik – paasissutissalli corona hotlinemut sianeqqaarluni aatsaat paasisassaapput.
Oqartoqartariaqarpoq ullormiit ullormut taamatut aaliangernerit inuiaqatigiinnut toqqissisimananngitsumik kinguneqartitsisut, aammalu piareersarluarsimanngitsumik ingerlanneqartut. Inuiaqatigiinni pissutsit ingerlaavartissallugit piareersimalluarnissaq suleqatigiilluarnissarlu pingaaruteqarluinnarput, aammali immitsinnut paaraluta toqqissisimallutalu ulluinnatta ingerlannissaa pillugu ersarissumik siulersorneqarnissarput pisariaqartipparput. Aningaasarsiorneq ingerlaannassappat nukiit atorfissaqartinneqartut ilisimaaralugillu suleqatigineqartariaqarput. Uani takusinnaavarputtaaq Nunatsinni peqqissaasut kattuffiata ernumalluni tusagassiuutitigut nalunaarutaat, ilaatigut sulisut qimarratilernissaannik ernummateqarnerannik imaqartoq. Tamatuma takutippaa sinaakkutinik killilersuutinillu sukannersunik piviusorsiortunillu pisariaqartitsisoqartoq. Taamatuttaaq antigentestit pisiniarfinni pisiassat pillugit nutaarsiassatigut arlaleriarluta paasivarput inuit tamarmik pisinissaminnut akissaqanngitsut.
Inuppassuit apeqquterpassuarnik imaaliallaannaq akineqarsinnaanngitsunik peqalerput, tamannalu aamma facebookikkut oqallinnerujussuarmik pilersitsivoq, ilaatigut avissaartuuffiusumik.
Una allannerani maleruagassat nutaanngitsut www.coruna.nun.gl-mi suli nassaassaapput sulilu nutarterneqaratik, inuillu tamarmik suli internetikkut attaveqanngillat. Isumaqarpunga ingerlaaseq taamaattoq unittariaqartoq, pitsaasumillu paasissutissiisarnermik taarserlugu. Assersuutigalugu naluarput taamatut inuiaqatigiinnut ammaaneq qanoq siunertaqarnersoq. Anguniarneqarpa innuttaasut amerlanerpaartaat coronamik tunillatsinniarneqarnerannik? WHO ilisimatitsivoq omikron tassaasariaqanngitsoq pandimip naammatsilernerani tassaasoq takussutissaq, ernumagivaali tunillatsittut amerlanerujussuat pissutigalugu nutaamik allanngorartumik pinngortoqaqqinnissaa periarfissaasinnaasoq. Tamanna peqqissinnaavinnit qanoq upalungaarsimaffigineqarpa? Aamma illoqarfinni atuarfiit, meeqqeriviit, utoqqaat illui allallu suliffeqarfiit sulisussaarutissappata upalungaarsimaarnissaq qanoq eqqarsaatersuutigineqarpa? Nunaqarfiimmi illoqarfiillu isorliunerusut qanoq piareersimaffigineqarpat?
Maannamut tunillatsittut amerligaluttuinnarneranni periusissat malittarisassallu ersarissut sumi tamaani nuimatilaassallugit pingaaruteqarput, innuttaasunik toqqissisimatitsissammata. Massakkut pissutsit saqqummiunneqartut aallaavigalugit ernumanarpoq corona pissutigalugu toqukkut qimaguttartut amerligaluttuinnarnerat. Taamaattumik kissaatiginarpoq ammasumik killiffimmik ilisimatitsiuarnissaq aallunneqassasoq, aammalu killilersuutinik killiffik aallaavigalugu tulluarsaajuarnissaq pisariaqartoq paasissutissiissutigineqartassasoq.
Kissaatiginarluinnarporluunniit Inatsisartugut immikkut ittumik ataatsimiisinneqarnissaat aaqqissuunneqassasoq, tassani corona pillugu alloriarfissat siunissamilu periusissaq ataatsimoorussaq ersarissoq suleqatigiissutigalugu aaqqinniarneqassasoq. Nunatta aningaasatigut inissisimanera eqqarsaatigalugu aningaasarpassuarnik atuiinnaraluarutta aningaasassaarulluta ajalusoortussaavugut.