Sermersuummi eqqartuussiviup pineqaatissiissuteqarnerata kingorna, suliap eqqartuussivitsigut naammassineqavinnissaata tungaanut, Aslak W. Jensen Inatsisartunit sulinngiffeqarniarluni ullumi Inatsisartut allattoqarfianut qinnuteqarpoq
Inatsisartunut ilaasortaq, Aslak W. Jensen, januaarip 17-iani Sermersuummi eqqartuussiviup eqqartuuppaa. Eqqartuussinerup inerneraa, pinerluuteqaqqissappat ulluni 20-ni pineqaatissinneqarsimasut inissiisarfianniittussanngortinneqassasoq.
Pineqaatissiissut nunatta eqqartuussisuuneqarfianut ingerlateqqissallugu Aslak W. Jensen aalajangerpoq. Ilutigisaanik Inatsisartut sulinerat akornusersorniarnagu, suliap naammassineqavinnissaata tungaanut Inatsisartunit sulinngiffeqarniarluni Aslak W. Jensen aalajangerpoq.
– Taamak kissaateqarsimavunga, isumaqarama uannut tunngassuteqartut Inatsisartut sulinerannut akornusersuissanngitsut. Eqqartuussivitsigut uannut tunngasumik suliaqartoqartillugu pissusissamisoornerutippara, suliap naammassineqavinnissaata tungaanut sulinngiffeqarallaruma. Neriuppunga nunap eqqartuussisuuneqarfiani suliaq ingerlaqqippat pinngitsuutinneqassallunga, taamallu siunertaqarlunga suliamik ingerlatitseqqissimavunga, Aslak W. Jensen oqarpoq.
Aslak W. Jensenip aalajangernera Siumumit tusaatissatut tiguneqarpoq.
– Eqqartuussiviup aaliangernera ataqqillugu aamma Aslak W. Jensenilu oqaloqatigiilluareerluta tamanut pitsaanerpaamik aaqqiissuteqartoqarpoq. Taamaattumik Aslakip aaliangernera Siumumi tusaatissatut tiguarput ataqqeqqissaarlutigulu, Siumup siulittaasua Erik Jensen oqarpoq.