Karrat kangerluat il.il. pillugit apeqquteqaat

Karl Tobiassen, Inatsisartunut ilaasortaq

Inatsisartut suleriaasianni § 37 imm. 1 naappertorlugu Naalakkersuisunut apeqqutit imaattut matumuuna saqqummiuppakka:

 Naalakkersuisunut apeqqutit:

  1. Karrat kangerluani qaqqat nakkaaratarsinnaasut eqqarsaatigalugit Naalakkersuisut nutaarsiassanik massakkumut nutaanik qanoq ilisimasaqarpat?
  2. Karrat 3 misissuiffigineqarsimappat Naalakkersuisut qanoq ittunik paasissutissaateqarpat?
  3. Ukiuni tulliuttuni naatsorsuutigissavarput Uummannap eqqaaniik piffinnut ulorianartorsiorfiunngitsunut nutsertitsineq Naalakkersuisut ingerlatiinnassagaat?
  4. Upernaaq Uummannami Naalakkersuisut paasissutissiiartornerminni neriorsuutaat Illorsuit Nuugaatsiallu qanitaani Tele-p (tusass) Mobilinut attaveqaataasa atuutileqqinnissaanik piaartumik attaveqaasernissaat suliaq sumut killippa? Qaqugulu attaveqalissappat?
  5. Illorsuit inuisa uteqqissinnaanerannut tunngasumik Naalakkersuisut suliaqarpat?
  6. Avannaata Kommunia suleqatigalugu suliffeqarfiit tassaarsuaqarpat iliuusissatut pilersaarutit  Upalungaarsimanermut isumaginnittut peqatigalugit suliarineqarnikuuppat?
  7. Tassaarsuaqarnissaanut aarlerisaarinermut tunngatillugu aarlerinarneranut qanoq ittunik paasissutissanik nutaanik peqartoqarpat?
  8. Tassaarsuaqanissaanik aarlerisaarinerup kingorna nuuttoqarsinnaaneranik periarfissiinerup kingorna ilaqutariit qassit periarfissamik tamatuminnga atuillutik nuuppat?
  9. Inersimasut qassiuppat? Meeqallu Qassiuppat?

Tunngavilersuutit:

Tassaarsuaqarsinnaaneranut tunngatillugu upernaaq paasissutissiinerup kingorna,aammalu aasaq nutsertinniarnermut tukattumik suliat eqqarsaatigalugit Naalakkersuisut massakkumut iliuutsinik periutsinillu tingussaasunik innuttaasunut matoqqalluinnarnerat toqqissisimananngimmat.

Aammalu Uummannami paasissutissiilluni ataatsimiisitsinermi Naalakkersuisut tusass-ip attaveqaataasa atoqqilersinnaanerannik neriorsuutertik qanoq sumullu killinnersoq paaserusunnarsimmat.Attaveqaatimmi atoqqilersinnaappata angallannerup nalaani pissappat inoqarfinnut nalunaarasuarsinnaanermut isumalluutaalluinnartussaammata.

Ukiuugaluarpat, aasakkullu aalisartunit piffik najorneqartuartuummat pisariaqarluinnarpoq attaveqaatit atorneqarsinnaalernissaanik sulianik ingerlatsisoqarnissaa.

Aammalu naviasaarisoqaraluartoq aasaanera tamaat aalisartunit ilaqutariinnillu angallattunit inuerutinngisaannangajammat.

Taamaammat pisariaqartippara apeqquteqaatikka Naalakkersuisunit sukumiisumik akissuteqarfigineqarnissaat. Apeqqutit akineqarnissaat ullut suliffiusut qulit iluini kissaatigaara.