Isumasioqatigiissitsinissamut qaaqqusissut kingusippallaarujussuarpoq

Aalisarnermut Piniarnermullu Naalakkersuisup siorna angalanermini oqariartuutigisareerpaa, kujataamiut aamma Aalisarnermut Isumasioqatigiissitsinermut peqataajumaartut. Taavami sumiiffiit allat assigalugit ornigulluni isumasioqatigiissitsili

All.: Margrethe Thårup Andersen, Siumut sinnerlugu, Inuussutissarsiornermi ataatsimiisitaliami ilaasortaq, Kujalleq

Aalisarnermut Piniarnermullu Naalakkersuisup Aalisarneq pillugu isumasioqatigiissitsinissaannut Nuummi 9-10. marts 2022 qaaqqussutaa tallimanngornermi 4. marts 2022 unnukkut nassiunneqarpoq.

Taamaattumik Kommune Kujallermi Inuussutissarsiornermut Ataatsimiitsitaliamut ilaasortaasugut tamangajavitta ajoraluartumik peqataasinnaanngilagut, ilisimaaraarpummi kujataani angalaniarneq taamak kipiluttunareerluinnaqqissaartiginersoq, piffimmilu matumani Naalakkersuisut pingasut kujataannut angalarrapput, taakkulu timmisartumi inissanik annertuunik tigusereerput.

Soorluluunniit nalaatsornerinnarmik qaaqqusissut kingusissukkut nassiunneqarsimasoq, Kommune Kujallermiimmi qinikkanik annermik peqataatitsinngitsoornermik kinguneqarpoq.

Taamaattumik Aalisarnermut Piniarnermullu Naalakkersuisoq, Aqqaluaq B. Egede, kaammattorumavara kujataanut Aalisarneq pillugu isumasioqatigiissitsiartoqqullugu, kujataanummi siorna angalanermini oqariartuutigisareermagu kujataamiut aamma Aalisarnermut Isumasioqatigiissitsinermut peqataajumaartut.

Aalisarnermut Piniarnermullu Naalakkersuisoq pissutsit qanimut isigalugit, atuisullu tikillugit isumasioqatigiissitsisariaqarpoq.