Kalaallit oqaasii akeqanngitsumik ilinniarneqarsinnaalerput. Danskit aningaasanut inatsisaanni 2022-mut atuuttussami Siumut kiisalu danskit naalakkersuisui isumaqatigiipput, ukioq manna aallarnerfigalugu kalaallisut oqaatsit nittartakkakkut akeqanngitsumik ukiuni tallimani tulliuttuni ilinniarneqarsinnaasut. Sakkussaq kalaallisuumiit tuluttuumut nutserissutaasinnaasoq aamma naammassilerpoq
Inersimasunut kalaallisut ilinniusiut LearnGreenlandic.com saqqummerpoq tamanit atorneqarsinnaalerluni.
Folketingimi ilaasartoq Aki-Matilda HĂžegh-Dam, suliniutip pilersinnissaanut suleqataanikuuvoq. Nittartakkatigut kalaallit oqaasii ilinniarneqarsinnaalernerat nuannaarutigalugulu neriuuteqalerpoq.
– Kalaalerpassuit oqaatsitik atorunnaarnikuuaat, aamma Nunatsinnut nutsertorpassuaqarpoq oqaatitsinnik ilinnniarnikuunngitsunik. Nittartakkatigut oqaatsitta ilinniarneqarsinnaalernerat oqaatitsinnik nukittorsaassasoq neriuutigaara. Aamma Nunatsinnut nutsertut inuiaqatigiinnut akuunerulernissaat assinganik neriuutigaara, Siumup Folketingimi ilaasortaatitaa oqarpoq. Kalaallit oqaasiinik nammineerlutik ilinnialertussanut kaammattuutigaa nalunngisaminnik ilinniaqateqassasut.
Aningaasanut inatsimmi 2022-mi atuuttussami Siumut katillugit 2 millioner kroninik immikkoortitsivoq, taamaasilluni kalaallisut ilinniusiut akeqanngitsumik ingerlanneqarsinnaassalluni. Ilinniutip ineriartorteqqinneqarnissaanut, modulikkaartumik atuartitsisoqalernissaanut kiisalu oqaatsinut sungiusaatissatut atorneqartussanut aamma 1 million kroninik immikkoortitsisoqarpoq.
LearnGreenlandic.com-imik aallarnisaasup Per LanggÄrdip ilisimatitsissutigaa, oqaatsinut sungiusaatit nutaat qulinit 15-inut amerlassuseqartut juullinnginnerani atorsinnaalerlugit naammassissasut ilimagigini.
– Aningaasaliisoqarnera pissutaalluni kalaallit oqaasiinik nittartakkakkut ilinniarusuttut amerlasoorujussuanngoreerput. LearnGreenlandic-imi nutaaliornikkut oqaatsitigut ilinniutinik programinillu takuneqarsimanngisaannartunik sananikuuvugut, Per LanggĂ„rd oqarpoq.
Modulit pingajuat saqqummingajalerpoq
Nittartakkakkut kalaallisut marlunnik modulinngorlugu ilinniartoqarsinnaavoq. Modulit pingajussaat 2023-mi naammassisimassasoq naatsorsuutaavoq. Aamma kalaallit oqaasiinit tuluttut oqaasiinut nittartakkakkut toqqaannartumik nutserisoqarsinnaalernissaa LanggÄrdimit sulissutigineqarpoq. Tamanna periarfissaalernissaa LanggÄrdip qilanaaraa.
Nunap inoqqaavisa oqaasiisa illersorneqarnerat ataavartumik danskit aningaasaqarnermut inatsisaanniittariaqartoq Aki-Matilda HĂžegh-Dam isumaqarpoq. Soorlu Danmarkimi inuiaat ikinnerussuteqartut oqaasii illersorniarlugit ukiut tamaasa aningaasaliiffigineqartartut.