Innarluutilittagut inatsisitigut illersugaapput, uppernarsereerparpulli inatsisit piusut piviusumik pineqartunut illersuisinnaanngitsut. Killiffik akuersaarneqarsinnaanngilluinnarpoq
All.: Laura Taunâjik Uitsatikitseq, Sermersuummi kommunalbestyrelsimut ilaasortaq
Takorluulaarsiuk innarluutilik imminut illersorsinnaanngitsoq ikioqqulluni nilliasinnaanngitsoq sulisumit tatigilluinnakkamik unnuaannarmi iserfigineqarluni kinguaassiutitigut atornerlunneqartoq. Takorluulaarsiuk qanoq pineqarnermini oqarsinnaanani anniartoq, kimilluunniit illersorneqarsinnaanani ikioqqugaluartoq. Neriukkaluartoq ikiortissamik isertoqarsinnaassasoq, nuinngisaannartumilli. Ilaa eqqarsaat annernaq, takorlooruminaak? Aali nunatsinni pisoq, tassa killiffipput taamak amiilaarnartigaaq.
Innarluutilittagut inatsisitigut illersugaapput, uppernarsereerparpulli inatsisit piusut piviusumik pineqartunut illersuisinnaanngitsut. Killiffik akuersaarneqarsinnaanngilluinnarpoq, aporfissalersuinerpassuit suli piupput. Naak takusinnaagaluarlutigu qanoq aarlerinartoq sakkortutigisoq ilutsinni akuusoq. Pissutsit paqumigiinnarnagit eqqartorsinnaasariaqarpagut, taakku sinnerlugit uagut oqarsinnaagatta iliuuseqarsinnaallutalu.
Nunarput tamarmi aalassatsinneqarpoq, kamak pisuutitsiniarnerillu sakkortuut saqqummerput. Kikkut tamarmik imminnut umerput, akisussaasussamillu ujartuipput. Kingusinaarneq sakkortooq, kingusinaarneq akuersaarneqarsinnaanngitsoq, kingusinaarneq isiginnittaatsinut allanngortitserujussuartoq. Massakkuuvoq allannguinissamut pisussaaffipput. Illit uangalu akisussaaffipput.
Inatsimmi allaqqavoq, ulloq unnuarlu angerlarsimaffimmi ineeqqat tamarmik ineqartunit privateqarfiusariaqartut. Ukuli innarluutillit oqarsinnaanngillat, qanoq pineqarnerminnik nassuiaassisinnaanngillat. Taamaattumik tamanut toqqissisimanarnerpaaq tassatuaalerpoq ineeqqat tamarmik filmiliuuteqalernissaat. Nakkutigineqarneq sakkortunerpaaq atorlugu paarineqarnissaat.
Kinaluunniit inuk pisinnaatitaaffeqarpoq, pisinnaatitaaffik innarluutillit aamma pigaat. Massakkut pisut assingusumilluunniit pisoqariataaqqinnissaa utaqqineqartariaqanngilaq, massakkuusariaqarporli una oqallisissiaq aalajangiiffigisassatut siunnersuutitut Inatsisartuni taasissutigineqarnissaa.