Issittumut periusissiaq sivisuallaamik suliarineqalersoq Siumut isumaqarpoq. Tigussaasumik isummerfigisinnaasatsinnik tigusaqarnissarput pisariaqartipparput.
All.: Doris J. Jensen, politikikkut oqaaseqartartoq, Siumut
Issittumut periusissiaq Nunatta namminerisaminik pigisassaa Naalakkersuisunit ukioq ataasingajak suliarineqarluni ingerlanneqarpoq. Nunattalu nunarsuarmioqataasutut namminerisamik periusissiaqarnissaa pisariaqarlunilu pingaaruteqarpoq, taannalu nukinginnarsisoq Siumut isumaqarpoq.
Ukioq manna aallartilaarsimalersoq Naalakkersuisut avammut ilisimatitsipput, periusissiaq sulinerineqarluni ingerlanneqartoq. Maannalu ukioq naajartortoq periusissiaq suli utaqqineqarpoq.
Nunarsuarmi pissutsit silallu pissusiata allanngoriartornerani issittoq annertuumik nunarsuarmioqatitsinnik ukkatarineqarpoq. Nunat allat, soorlu Kina, Korea, Frankrig il. il. issittumut periusissianik suliaqarnikuupput. Uagut issittormiuulluta periusissiamik peqannginnerput ullorlu manna tikillugu naammassisaqannginnerput Siumup ilungersunartutut isigaa.
Taamaattumik Naalakkersuisut piumaffigaavut periusissiaq naammasseqqullugu, aamma partiit maannamut oqariartuutsigisimasaat ilanngullugit ataqatigiissaaqqullugit.