Piffissami aggersumi suliffeqarfiit inuiaqatigiit pigisaat, Royal Arctic Line aamma Tusass nutaanik pisortassarsiuunneqartussaapput. Pisortatullu inissinneqartussat kalaaliussasut Siumup piumasaraa.
All.: Najaaraq Møller, Inatsisartunut ilaasortaq, Siumut
Inuiattut kiffaanngissuseqarnerput namminiussuseqarnerpullu pissusissamisoortumik ukiuni makkunani Siumumi politikikkut angutserlugu sulinerput ingerlapparput. Tamanna aamma isumaqarpoq, suliffeqarfiutitsinni allaffissornikkullu sutigut tamatigut uatsinnut salliutilluta ingerlatsissasugut.
Siumut isumaqarpoq, inuiaat atasinnaasumik ingerlassappata, allamiunik pisortalersorluni inuiaqatigiit ineriartortinneqarsinnaanngitsut. Allamiut piginnaasaat suliffeqarfippassuarni pinngitsoorsinnaanngikkivut nalunngilarput, kisianni tamanna isumaqanngilaq kalaallit qarsupiinnarlugit naalagassatsitut inississussagivut.
Naalagaaffinngornissaq ilumut pimoorussimagutsigu suliffeqarfinni suugaluartuniluunniit, pingaartumik inuiaqatigiittut ingerlatatsinni, piginnaasatigut immitsinnut apeqqusersortutut pissusilersortarnerput unilluinnartariaqarpoq.
Siumuminngaanniit inuiaqatigiinni ilinniagaqassutsip qaffakkaluttuinnarnera malinnaaffigivarput. Aamma misilittagarineqalersut annertoqisut arajutsisimanngilavut. Qularutiginngilluinnarparpullu kalaallit RAL-imi, Tusassimi allanilumi pisortaaninngorsinnaasut ikinnavianngitsut. Inuit kalaallinik paasinnissinnaasut, kulturitsinnik inuiaqatigiinnilu pissutsinik ilisimasaqartut peqataatitsisinnaasullu salliutissallugit tamatta pisussaaffeqarpugut.
Taamaammat Naalakkersuisut piumasaqarfigaavut suliassaq pimoorullugu tigoqqullugu namminiussuseqarnerpullu salliullugu suleqqullugit. Kalaaleqatitsinnik atuinnginnissatsinnut qangarsuarli utoqqatsissutissaarunnikuuvugut.