Inuit Ataqatigiit siulittaasuat aamma siulersuisui Naalakkersuisooqatigiinni suleqatigiinneq pillugu tunngaviusumik nalilersugassaqartut Siumut isumaqarpoq
All.: Erik Jensen, siulittaasoq, Siumut
Tallimanngormat novembarip 11-ani immikkoortoq 7-ip, tassa aappaagumut aningaasanut inatsisissatut siunnersuummi Inatsisartuni samminninnermi, aappassaaneernerani Inuit Ataqatigiit sinnerlugu apeqquteqartoq, Kristian Jeremiassen, sakkortuumik Siumumut saassussivoq.
Pineqartoq apeqquteqarnermini Siumumut eqqunngitsumik appisaluussilluni assullu kamalluni ilaatigut oqarpoq “kisianni ajoraluartumik Siumut Naalakkersuisooqatigilerparput. Malugalugu ajoraluartumik”[1]. Kristian Jeremiassen Inatsisartuni Sanaartornermut Ataatsimiisitaliami Inuit Ataqatigiit siulittaasuutitaattut oqaatigaa, aappaagumunngooq Qasigiannguani inissianik isaterisoqarnissaanik siunnerfeqartoqarnerarlugu. Tamanna sakkortunerpaamik Siumumiit eqqunngilluinnartumik tunngaveqartoq naqissusissavara!
Taamak avammut oqariartuuteqarneq imaannaanngitsigisoq Siumumiit assut ilungersunartutut aammalu utoqqatsernerinnakkut qaangiinnagassaanngitsutut isumaqarfigaarput.
Erseqqissaatigineqassaaq Aningaasanut Inatsimmi 2023-imoortumi Anlægsoversigt tassaammat ukiut siuliini aningaasaliissutaasimasut qanoq atorneqarsimaneri aammalu aningaasaliissutit atorneqanngitsut sinnerinik takussutissiat.
Siumumiit isumaqarpugut Inuit Ataqatigiit Inatsisartuni ilaasortaatitaasa ilaat taamak eqqunngitsigisumik tunngavissaqanngitsigisumillu, Naalakkersuisooqatigiillu nunarput tamakkerlugu siammasissumik ataatsimoornermik suleqatigiinnermillu anersaaqarlutik sulinerannik, apeqqusersuinertut annertuuttut maluginiagassaasoq. Oqaaseqartup Inuit Ataqatigiit siulersuisuunerisa Siumumik suleqateqarsimalernerannik paasineqarsinnaasumik avammut oqaaseqarnera tunngavigalugu, Inuit Ataqatigiit siulittaasuat aamma siulersuisui tunngaviusumik nalilersugassaqartut Siumut isumaqarpoq, nalilersuinerlu tamanna Inatsisartut ukiaq manna ataatsimiinnerisa naammassinnginnerani avammut ilisimatitsissutigineqassasoq Siumup piumasaraa.
Siumup erseqqissaassutigissavaa, Naalakkersuisooqatigiit akunnerminni suleqatigiinnerat ajunngitsutut nalileratsigu, Inuit Ataqatigiilli suliassaqarmat.
[1] https://ina.gl/samlinger/oversigt-over-samlinger/samling/dagsordener/dagsorden/?day=11-11-2022
Paasissutissat
Pineqartumut Inuit Ataqatigiit, Kristian Jeremiasseni oqaaseqartoralugu, ima oqarput:
“… Ukiorpaalunnguit marluk-pingasut qaangiupput Qasigiannguani illunik isaterisoqarmat. Illoqarfimmut sunniuteqaqaaq. Aamma ajortumik kinguneqarpoq. Qujanartumik qinersivugut aamma Naalakkersuisut nutaat taakkua atuutsilerput. Inissianillu isaterineq, taanna politiki allanngoqqittariaqarpoq. Isertuutsissanngilara qujagaluarama isatereqqittoqassanngitsoq. Kisianni ajoraluartumik Siumut naalakkersuisooqatigilerparput. Malugalugu ajoraluartumik. Massakkut Qasigiannguani aamma aappaagu isaterinissamik siunertaq taanna ingerlateqqinneqalerpoq. Naak Inuit Ataqatigiit sinnerlugit Naalakkersuisunut ilaasortaasimasoq, Naleraq suleqatigigallaratsigu, Qasigiannguani isatereqqittoqannginnissaanik allakkanik peqaraluartoq. Ajoqaaq illoqarfiit mikinerusut naalakkersuisooqatigalusi taanna siunniussaq ingerlaqqissinnaammat. Siumut ingiaqatigalugu. Qasigiannguani millisaaneq. Finanslovimi uani qupperneq 201-mi takuneqarsinnaavoq, Qasigiannguani isaterinissamik Naalakkersuisut siunertaqaqqilersimasut. Peqqinnanngilaq. Aamma illoqarfiit ungasinnerusut ineriartortariaqarput.”