Kalaallit meerartaasa Danmarkimi angerlarsimaffiup avataanut inissinneqartarnerinut pissusissamisuunngitsunik pisoqartarpoq, kalaallillu meerartaat pillugit politikikkut akiuunnissaq ataavassaaq. Angerlarsimaffiup avataanut inissiinermi kalaallit meerartaasa naleqartitatik pingaaruteqartut, soorlu oqaatsit piorsarsimassuserlu annaasinnaavaat
Kattuffik Mentor Immanuel, kalaallit ilaqutariit Danmarkimi isumaginnittoqarfimmi suliani siunnersuisartoq, Siumut Christiansborg allaffiani pingasunngornermi ullumi pulaarput.
Mentor Immanuelimit ataatsimiinnissaq apersuutigineqarsimavoq, Siumut Folketingimit pilersaarneqarsimalluni. Siumut IA-lu Folketingimi ilaasortaatitaat, Aki-Matilda Høegh-Dam Aaja Chemnitzilu ataatsimiinnermi peqataapput.
Ataatsimiinnermi angerlarsimaffiup avataani inissiisarnermi unamillernartut arlallit eqqaanneqarput.
Ajornartorsiut pillugu nalunaarusianik saqqummiisoqarnikuuvoq, Siumut Folketingimi Mentor Immanuel qanimut suleqatigisimavaa.
Kalaallit meerartaasa Danmarkimi angerlarsimaffiup avataanut inissinneqartarnerinut pissusissamisuunngitsunik pisoqartarpoq, ullumikkullu ataatsimiinneq uppernarsarpaa politikkimiit kalaallit meeqqat pillugit akiuunnissaq ataavassasoq. Angerlarsimaffiup avataani inissiinermi meeqqat kalaallit naleqartitatik pingaaruteqartut, soorlu oqaatsit piorsarsimassuserlu annaasinnaavaat.
Taamaattumik politikkikkut akiuunnissaq ataavassaaq, angerlarsimaffiup avataani inissiisarnernerit pissusissamisuunngitsut pinatik.
– 2019-imi qinersisoqarmalli Mentor immanuel qanimut suleqatiginikuuagut. Aallaqqaammut Mentor Immanuelip oqaaseqaatai upperiumaneqanngillat, kisianni Siumup aningaasaliineratigut nalunaarusiamit kattuffik suleqatigalugu ajornartorsiutip annertussusaa erseqqissarpaa. Maanna piffissanngorpoq, aaliangersimasunik iliuuseqarnissaq Kalaallit Inuinut inatsisitigut isumannaatsuuneq isumannaarniarlugu, isumannaarlugulu meeqqat kalaallinik nagguillit inissiisarnernit tunngavigalugit oqaatsigut piorsarsimassuserlu annaannginnissai. Ingerlatereerparput Siumumiillu akiuunnissaq ataavarnissaannut piareeqqavugut, innuttaasut kalaallit inatsisitigut isumannaatsunik assinganik Danmarkimi pineqarnissaat anguniarlugu, Siumut Folketingimi ilaasortaq, Aki-Matilda Høegh-Dam oqarpoq.
Siumut Folketingimi neriuutigineqarpoq, maanna qinigaaffimmi kattuffik Mentor Immanuelilu qanimut suleqatigiinneq ingerlaannassasoq.