Borgmesterertaamit neriorsuut atituumik suleqatigiinnissaq oqaasiinnaavoq aamma IA-p kinaassusivia Naleqqamit tunuliaqutaqarluni takoqqipparput; pissaaneqarniakujunneq nalissaqanngitsoq. Aamma kommunimi amerlanerussuteqartut neriuutissaarullutik iliornerat, suullu tamaasa sakkugalugit missingersuutinik piviusorsiunngitsunik aalajangiinerat, putorujussuarmik tunngavilersorneqarsimanngitsumillu 1.250 millioninik amigartooruteqarfiuvoq. Karsi imaqanngilaq
All.: Siumup gruppia, Kommuneqarfik Sermersooq
Ataasinngorneq ulloq 31. oktober Kommuneqarfik Sermersuup kommunalbestyrelsiani Siumut gruppiat aappassaanik isumaqatiginninniaqqullugit aggersarneqarput. Tassa Siumut gruppiata missingersuutinut 2023-mut ukiullu pingasut siumoortunut kissaataannik ullut sisamat tunniussiffiata kingornagut. Siumut gruppiata tupigusuutigingaarpaa innuttaasut atugarissaarnissaanik isumaqatiginninniarnermik taasaq.
Borgmesterissaq maajimi innersuunneqarmat ammasumik aqutsineq suut tamaasa saqqummiunneqartarnissaat aamma kommunalbestyrelsip ataatsimoortinneqarnissaa neriorsuutigineqarpoq. Taakku marluk borgmesterip naammassisinnaasimanngilai. Kingumut qiviarnermi Siumut borgmesterimut akuersaarnera akuersaannginneraluunniit aalajangerneruvoq eqqortoq. Tassami siunertat pitsaasut takoqqaarusukkatsigit tamakkulu pisimanngillat.
Missingersuut 2023
2023-mut ukiunullu aggersunut missingersuutit piareersarnerinut Kommunalbestyrelsip piffissarujussuaq atorsimavaa aamma amerlasuut eqqaamassavaat qineqqusaarnermi isumaqatiginninniarnermi ingerlariutsit allaanerusut kissaatigalugit Siumumit uparuaanerput, tamannalu borgmesterip nutaap piviusunngortikkumallugu oqaatigaa. Siumumit takusarput ingerlaaseq atoriigarput aatsaat taama ajortigaaq, pisuusaarneq assissaqanngitsoq.
Pisup ilungersunarnera uppernarsarneqarpoq amerlanerussuteqartut Inuit Ataqatigiinneersut Naleqqameersullu missingersuutit pillugit isumaqatigiissut piviusorsiortuunngitsoq atsiormassuk. Missingersuutit tunngaviusumik piumasaqaatigaa Naalakkersuisut aningaasanik taarsigassarsiniarneq 1.250 million koruuninik nalilik akuerissagaat. Taarsigassaq kommunip ukiumut aningaasaqarnerata 60 procentingajaanik nalilik.
Pisuusaarneq
Siumup missingersuutinut kissaatini tunniuppai 12. oktober 27.oktoberilu Siumut ataasimiigiaqquneqarpoq 30 minutsinik sivisussusilimmut, tassani kissaatini allaganngorlugit tunniuteriikkani saqqummiukkiartorpai. Ataasinngornermi 31. oktober aqagumut Folketingimut qinersisoqartussaasoq isumaqatiginninniarnerup aappaanut aggersarneqapallappugut, tamatumuunakkut minutsinik 15-inik periarfissinneqarluta. Ataatsimiinneq minutsinik tallimanik sivisussuseqarpoq.
Tassani paasitinneqarpugut isumaqatiginninniarnermi ilaajunnaartugut. Siunnersuutivut marluk ingerlaqqipput; Paamiut pillugit pilersaarut tamakkiisoq aamma Naluttarfiup Maliup nutarternera aamma amerlanerussuteqartut – Inuit Ataqatigiit aamma Naleraq – isumaqatigiissummut ilaatikkusunngikkaatigut ”taarsigassarsiniarnissamut 1.250 millioninik nalilimmut akuersaarsimannginnatta”.
IA-p aamma Naleqqap 1.250 million koruuninik, kommunip ukiumut missingersuutaasa 60 procentiata missaanut nalilimmut, ukiuni kingullerni annaasaqangaarnerit matussuserniarlugit taarsigassarsiniarnermi aaqqissuussani tamani nukingisaarinerata takutippaa kommunitta ajorluinnartumik aqunneqarneranik. Isumaqatigiit ilisimalluinnarpaat Siumut akerliusoq sumilluunniit nassuiaasoqanngimmat aamma kommunalbestyrelsimut aammalumi aningaasaqarnermut ataatsimiititaliamut uppernarsaasoqaranilu qulaajaasoqanngimmat. Siumut arlaleriarluni kommunip imminut aningaasanik akuersissuteqartarnera millionilikkaanik marlunnik kisitsisitalinnik killeqanngitsunik tunisarnera akerlilertarpaa, iluatitsiviunngitsumik. Isertugaataanngilaq Sermersuumi Siumup paaserusukkaa qanoq ililluni NCD A/S aningaasallu atorsinnaasat eqqumiitsut allat kommunip aningaasaqarnera aserorsinnaagaat. Kiap tamanna akuersissutigaa? Kommunimi aqutsisut Inuit Ataqatigiit aamma Naleraq politikikkut illersissaralugit.
Issaq isumaqatiginninniarnerni tassanngaannaq unitsinneqartuni amerlanerussuteqartut missingersuummut kissaataannik Siumut paasisaqanngilaq tusagaqaraniluunniit. Siumut toqqammaveqarluarpoq tapersersorteqarluarlunilu, siunnersuutinut nassuiaasersukkanut nassiussatsinnut tapersiilluartunik. Taakku saniatigut suliniutinut IA-kkut Naleqqallu maanna siunnersuutigineragaannut Siumut tapersiilluarnikuuvoq. Piviusoq unaavoq isumaqatigiit maanna ”missingersuutinut isumaqatigiissut” atsiorsimaleraat namminneq siunnersuutitik saqqummiunnagit. Tamanna inuit qanimut sunniuteqarsinnaanerannut suleqatigiiffiusumi suleriuseq eqqumiitsorujussuuvoq. Aamma iluaqutaanngilaq isumaqatigiissummi oqaatsit iiuminartut atorneqarneri, soorlu ”suleqatigiinneq” aamma ”kommunalbestyrelse isumaqatigiittut”. Tamanna eqqunngilluaasarpoq, aamma tassaavoq eqqunngitsumik oqalunneq, nunattalu oqaluttuarisaanerani nutaanerusumi pissaaneqarniakujunneq assissaqanngitsoq.
Sullissineq pitsaaneq
Siumup siunnersuutaaniippoq utoqqaanerusunut, inuusuttunut meeqqanullu pitsaanerusumik sullissineq. Pinaveersaartitsinermi suliniuteqarneq aaqqissuulluagaanerusoq, suliniutit qinngasaarinnginnissamut aamma atuarfiup angerlarsimaffiillu akornanni pitsaanerusumik suliniuteqarneq, plejehjemmini ulluuneranilu paaqqinnittarfinni sulisunik ilinniarsimanngitsunik pikkorissaaneq, sulisut tamarmik inuttut ineriartortissallugit pikkorissaanerit aamma nunaqarfinni inuussutissarsiornermi pissutsinik pitsanngorsaanerit. Sanaartornerup iluani Nuummi inissianik pitsaanerusumik tulleriiaarineq, Nuussuup Nuullu akornanni sullorsuup neruttornissaanut siuartitsineq, Kuummiuni Tasiilamilu inuusuttut inissaliorneq, Paamiuni Tasiilamilu inissaliornissamik qulakkeerinninneq, kiisalu umiatsianut mikisunut amoortaat, Qeqertarsuatsiaani umiatsialivik qimarnguik, Kapisilinni aqqusinniorneq siunnersuutit ilagaat.
Taakkuninnga qanoq iliuuseqarniarnermut akissutissaqanngilaq. Takusinnaavarput amerlanerussuteqartut Siumup tunngavilersorluakkamik siunnersuutaannit isumassarsitinneqartut. Tamannalu innuttaasunut iluaqutaassaaq.
Paasissutissat
Aningaasaqarnermut Inuussutissarsiornermullu Ataatsimiititaliap ataatsimiinneranit, 16. maj 2022
Siumumit ikinnerussuteqartutut oqaaseqaat: Siumut oqaluuserisassat akuerineqarneranni saqqummiivoq oqaluuserisassaq ammasumik oqaluuserineqassasoq innuttaasut isertuanngitsumik kommunip aalajangiineri paasiniassammatigit.
Siumut isumaqarpoq taarsigassarsinissamut innersuut paasissutissanik naammattunik tunniussinngitsoq, naatsorsuinernut kisitsisit suut toqqammavigineqarpat aamma sooq 1,25 mia. koruuniussappat.
Nykreditip akissutaa kommuni taarsigassarsinissamut neriorsorneqarsimaneranik nassuiaatitut Siumup isiginngilaa, NCD-p Iserillu kattutsinneqarnissaat Siumup isumaqataaffiginngilaa, saqqummiussami suliffeqarfiup siulersuisui suliap ingerlanerani suut akisussaaffigisimaneraat iluamik paasissutissiisoqanngimmat.
Siumup erseqqissaassutigissavaa ulluunerani paaqqinnittarfinnik atuarfimmillu sanaartornissaq tapersersoratsigu, missingersuutilli siullermeerlugit oqaluuserinerini NCD pillugu eqqasuuteqarnitsinnut allakkatigut oqaaseqaateqarnerput innersuutigiinnarparput.
Aamma takuuk 2023-mut missingersuutinut Siumup isumaqatigiinniarnissamut siunnersuutai (pdf).