Pinaveersaartitsineq aqqutigalugu inuiaat peqqinnarnerusumik inuuneqarnissaannut aqqutissiuussineq isumaginniffiit tamarmik suleqataaffigisaannik ingerlanneqartariaqarpoq. Pinaveersaartitsinermik suliaqarneq nukittorsarneqartuassaaq – qitiusumi najugaqarfinnilu ataasiakkaani. Suliniarnermi innuttaasut suleqatigineqassapput.
Pinaveersaartitsineq pillugu Siunnersuisoqatigiit nuna tamakkerlugu atuuttut ataavartumik anguniakkanik periusissanillu naleqqussaallutik siunnersuusiortassapput, inuiaqatigiit naleqartitaat pingaartitaallu aallaavigalugit.
Paarisa tassaassaaq pinaveersaartitsinermi suliniarnermi aamma peqqissutsimik siuarsaanermi Naalakkersuisoqarfinni kiisalu kommunini suliniutinut attaveqaataallunilu ataqatigiissumik suliniarnissamut siuarsaasoq. Paarisap suliaasa pitsaasut innuttaasut akornanni suli sunniuteqarnerusumik atuutsinneqalernissaat siunertaralugu Naalakkersuisut kommunerujussuillu aaqqissuusseqatigiinnissaat Siumup sulissutigissavaa. Ullumikkut aningaasarpassuit pinaveersaartitsinermut Paarisa Inuunerittalu aqqutigalugit atorneqartarput, kommunerujussuillu akisussaaffiinut toqqaannarnerusumik sammiveqartillugit, iliuusissanullu pineqartunut tigussaasunngortillugit, naleqqussarneqassapput.
Sukkumik atornerluinerup pinngitsuuisinnaajunnaarnerullu nappaatitut akuerisaalernissaa pisariaqarpoq. Siusinaartumik sukkumik atornerluisuusarnerup pinngitsuuisinnaajunnaartarnerullu pinaveersaartinnissaat sulissutigineqartariaqarpoq.
Ullumikkut inuusuttorpassuit naartuersittarput tamannalu inuttut naleqassutsimut annertuumik sunniuteqartarpoq peqqinnissaqarfinnullu annertoqisumik suliakkersuilluni.
Pinaveersaartitsinerit inuusuttut ornittagaani klubini, timersoqatigiiffinni allanilu annertusarneqartariaqarput.
Pinaveersaartitsinermik suliat annertusineqassapput, aamma kinguaassiuutitigut atornerluisut atornerlugaasimasullu sullinneqalerneri nanginneqassapput.
Tupamik pujortartarneq akiorniarlugu siusissukkut pinaveersaartitsisoqartariaqarpoq. Tupamik pujortaliaartartut ikiaroornartumik atornerluisunngornissaannut qaninnerusarmat.
Imerajuttunik, ikiaroorajuttunik aningaasanoorajuttunillu pinngitsuuisinnaanermik katsorsaanerit tamarmik peqqinnissaqarfiup iluaniilersinneqassapput. Katsorsaasut peqqinnissaqarfimmi atorfeqartuussapput, innuttaasullu peqqissarnissamik pisariaqartitsisut akeqanngitsumik katsorsartissinnaalernissaat isumagineqassalluni. Ilutigisaanik katsorsaariaatsit tulluartuunersut nalilersoqqinneqartassapput, periutsit allat aamma periarfissiissutiginissaat ammaffigalugu, soorlu Minnesota.
Najugarisami sunngiffimmi sammisassaqartitsinerit peqqinnartunik nuannersunillu imaqartikkumallugit innuttaasut namminneq peqataanissaat aqqutissiuutissavarput.
Isumaginninnermut ukiut tamaasa aningaasartuuterpassuaqartarneq eqqarsaatigalugu pinaveersaartitsinermut aningaasaliissuteqarluartarnikkut siunnersuisarnerit pitsaanerulernerisigut isumaginninnermut aningaasartuutaasartut apparsarneqassapput.