Inuiattut ileqqut – Piorsarsimassuseq – Kulturi

Oqaatsivut kulturerpullu nukittorsarneqassapput — inuiaqatigiinni illersorneqarlutik ingerlateqqinneqassallutik.

Nunarput ingerlanneqassaaq Kalaallisut oqaatsivut pisortatigoortumik oqaasiusut atorlugit. Taamaattumik oqaatsit pillugit inatsit oqaatitsinnik illersuisoq naleqqussarlugu ineriartortinneqartuassaaq.

Inuiaqatigiit atugarissaartut ilisarnaatigilluinnartarpaat kulturikkut sunngiffimmilu uummaarissumik peqataalluartarneq. Inuiaqatigiit tamatta suliassaraarput nunaqqatitta kulturikkut sunngiffimmilu peqataanissaannut pitsaanerusunik tunngavissiornissaq kiisalu nunaqqatigiittut qaammarsaqatigiinnissaq.

Piorsarsimassutsikkut ineriartortitsineq tassaassaaq inuiaqatigiinnit aallaavilik, inuiaqatigiit kissaataat aallaavigalugit. Siumumi isumaqarpugut piorsarsimassutsimut pisortaniit aningaasaliissutaasartut naalakkersuinikkut siunertarineqartunut naapertuuttuusassasut.

Nunatsinni kalaallisut oqaatsitta siunissami ajunngitsumik atugaanissaat Kalaallisullu atuakkiortarnerup ineriartortittuarnissaa siunertaralugu, Kalaallit Nunatsinni atuakkiortunngorniarfimmik pilersitsisoqarnissaa Siumup sulissutigissavaa. Siumup sulissutigissavaa, kalaallit atuakkiortuisa atuakkiai pissarsiariuminaatsunngorsimasut, e-book-inngorlugit imaluunniit atuakkat atuffassissutitut pissarsiarineqarsinnaanngornissaat. 

Siumup anguniarpaa nunatsinni suliffeqarfiit pisortat ingerlataat tamarmik oqaatsit pisortatigoortut – Oqaatsivut – atorlugit ingerlatsiviussasut. Pisortat suliffeqarfiini allanilumi sulisut oqaatsitsinnik atuinngitsut pisortatigoortumik oqaatsitsinnik ilinniarsinnaanissaminnut pinngitsooratik periarfissinneqassapput.     

Tusagassiuinermut tunngatillugu siammasissumik aallakaatitassiortarnerup nukittorsarnissaa pingaaruteqarpoq. Nuna tamakkerlugu tusagassiuutit nukittuut, ullumikkornit amerlanerusut allanngorarnerusullu pilersinneqarnissaat pisariaqarpoq, tamat oqartussaaqataaneranut pingaaruteqarmat.

Tusagassiuutitigut kiffartuussinissamik isumaqatigiissut ullutsinnut naapertuuttunngortillugu nutarteqqinneqassaaq. Aaqqissussaanermi oqartussaasut tassaassapput inuiaqatigiinni ilisimasaqarnertik, naleqartitatsinnik oqaatsitsinnillu piginnaasaqarnertik ilisimasaqarnertillu toqqammavigalugu atorfinitsinneqarsimasut.

Tusagassiuutit nukittunerulernissaat anguniarlugu, Siumut periusissiornissamik suliaqassaaq, ulluinnarni “medieforlig”-imik taaneqartartumik. Suliap siunertarissavaa, tusagassiuutit ataatsimut isigalugit qanoq atugassaqarnissaat ineriartornissaallu siunissami Inatsisartutigoortumik ukiunut arlalinnut atuuttussaasartussamik sinaakkuserneqarsimanissaat.

Nunap aqqinik tammatsaaliuinissaq inuiattut ileqqunik oqaluttuarisaanerannillu tammatsaaliueqataavoq. Taamaattumik nunap aqqinik nalunaarsuineq qaammarsaanerlu sukumiisumik suliarineqassapput.

Piorsarsimassutsikkut inuusaatsikkullu kalaallit oqaluttuarisaaneranni eriagisassat pingaaruteqartut najukkani ataasiakkaani katersugaasivinni, Nunatta Katersugaasiviani Allagaateqarfianilu, atuagaateqarfiillu allat aqqutigalugit tammatsaalineqassapput. Nunatsinni eriagisassat ajornannginnerusumik periarfissaqarluni innuttaasunit, ilinniartunit atuartunillu misissorneqarsinnaalissapput. Taamaattumik katersugaasivinnik pitsanngorsaanerit aamma annertusaanerit aallunneqassapput.

Eqqumiitsuliortut, sanaluttartut, atuakkiortut nipilersortartullu suliaminnut atatillugu pikkorissartinneqartassapput, suliaminnillu ingerlatsiffissaannik ineriartortitsisoqassalluni.

Nunani avannarlermiut naggueqativullu annertunerusumik kulturikkut suleqatiginerussavagut.

Nuummi kalaallisut oqaatsitta nukittorsarnissaat avaqqunneqarsinnaajunnaarpoq. Taamaattumik immikkut iliuuseqarluni oqaatsitta tammatsaaliornissaat suleqatigiissutigineqassaaq.

Eqqumiitsuliorneq, isiginnaartitsineq, nipilersorneq, erinarsorneq timersornerlu meeqqerivinni, meeqqat atuarfiini ilinniarfinnilu allani pingaartillugit ilinniartitsissutigineqartassapput. 

Inuiattut ileqqutoqqagut tammatsaaliniarlugit piniakkanik killilersukkanik agguaassisarnermi immikkut inuiattut piniariaasitoqaq atorlugu piniartunut pisassiisarnissaq ileqquliullugu eqqunneqassaaq.