Kommune Qeqertalimmi allaffissornikkut aqutsinermi qitiusumiit aalajangersaanerit aatsaat taamak sakkortutigisumik ingerlanneqalerput.
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Kommune Qeqertalimmi inoqarfiit namminneerlutik aningaasanik aqutsisinnaatitaanerannik ineriartortitsinissamullu pisinnaatitaaffiiagaapput. Tamanna akuersaarneqarsinnaanngilaq.
Naatsorsuutit ukiup sisamararterutaani siullermi (1. kvartalimut) minnerpaamik 22 mio.kr. sinnerlugit missingersuutit sipporneqartussanngornerat toqqammavigalugu Siumut gruppia saqqummiussaqarluni oqaluuserisassanngortitsisimavoq. Ulloq 6. juni 2023 kommunalbestyrelsip ataatsimiinnerani Siumup oqaluuserisassanngortitaa oqaluuserineqarpoq. Kommune Qeqertallip aningaasaqarnerata killiffia tamakkiisoq ulluni 28-29. juni 2023 kommunalbestyrelsip ataatsimiinnissaanut oqaluuserineqassasoq paaseqatigiissutaavoq. Sipaarniarnerit annertuut innuttaasunut kingunerlunnissaat qularutissaanngilaq.
Inoqarfiit namminneerlutik aningaasaliissutissanik pilersaarusiortarneranni missingersuutinillu suliaqartarneranni peqataatinneqaratik tusarniaaffigineqartarsimannginnerat ilungersunartutut oqaatigisariaqarpoq. Inoqarfiit namminneerlutik aningaasaliissutissanik pilersaarusiortarnerat missingersuutinillu suliaqartarnerat malinneqarnerusuuppat missingersuutit eqquutsinniarneri pitsaanerusimassagaluartoq isumaqarpugut. Inoqarfiit aningaasatigut pisariaqartitsinertik namminneq ilisimaneruaat aqulluarsinnaanerullugulu.
Siumumiit inoqarfiit namminneerlutik aningaasanik aqutsisinnaatitaanerat uterteqqinneqassasoq kissaatigaarput. Missingersuutit suliarineqartarneranni inoqarfiit namminneq pilersaarusiorsinnaasariaqarput aqutsillutillu.
Inoqarfinni tamani atorfillit tatigineqarnerullutik aningaasanik pilersaarusiorsinnaanerat ataqqineqarnerusariaqarpoq. Qitiusumiit aqutsinerujussuup atorfillit ilaannut tatisinera paasilluarsinnaavarput. Taamaammat atorfillit ataasiinnaanngitsut kommunimi suliinnarnissartik apeqqusertalerpaat. Kommunitut innuttakilliartornerpaanitsinni qitiusumiit aqutsinerujussuaq aaqqiissutissatut naleqqutinngilaq, inoqarfinni ineriartornissamut pisariaqartitsiffiusuni tatisimaneqarnerulermik kinguneqarmat.
Oqartussaaffik akisussaaffillu inoqarfinnut tamanut siammarniarli, qitiusumiit aqutsinerujussuaq atorunnaarlugu.