Imaannit qaqittakkatta sinerissap qanittuani aalisartunut iluaqutaanerulernissaat aningaasarsiutaanerulernissaallu periarfissiissutaanerussasoq Siumut isumaqarpoq, aamma aalisarnermut inatsimmi pisassiinermut ataatillugu piumasaqaatit naammassinniffiusussat erseqqissumik allassimasalernissaat pisariaqarpoq.
Siumut isumaqarpoq, sinerissap qanittuani imaannit qaqittakkatta naleqalersinnerunissaanut aqqutissarput maanna piareersarfigalugu aallartittariaqaripput, piffissanngortorlugu aalisartut taakkorpiaat aningaasarsiornissaminnut periarfissaqartinneqarnerulernissaat politikikkut aqqutissiuullugit aallartissagipput.
– Sinerissap qanittuani aalisartut nunarsuarmi niuerfinnut toqqaannaq appakaannerunissaat Siumup aqqutissiuunniarpaa. Nunatsinni aningaasarsiorneq taamalu naleqarnerulersitsinissaq siunertaralugu politikikkuttaaq sulilernissarput Siumup pingaaruteqartutut isigaa, Jens Kristian Therkelsen oqarpoq.
– Maannamut ukiorpassuarni inissisimaffigisarsimasarput qimanniartariaqaleripput isumaqarpunga, tassami sinerissap qanittuani aalisartut nunamut suliffissuarmut tunitsivinnullu taamaallaat tuniseqqissinnaasutut isigineqarnerat nalilersoqqillugu aallartittariaqaripput isumaqarpunga, taamaaliornitsigut inuussutissarsiummut ingerlataminnut kiffaanngissuseqarnerullutik ajunnginnerusumillu aningaasarsiorfissarsiorlutik aallussisinnaanngornissaat tamatta soqutigisariaqaratsigu, Jens Kristian Therkelsen oqarpoq.
Taamaattoq Jens Kristian Therkelsen erseqqissaavoq, tamanna isumaqanngitsoq, nunami nalitunerulersitsinissaq ilanngulluni suliassaanngitsoq. Taamaattumik assinganik pingaartigisutut isigaa, sulisartut ilanngullugit ineriartortitsivigineqassasut. Assersuutigaa, naatsorsueqqissaartarfik naapertorlugu 2019-mi sulisartut 1600 missat pineqarmata.
Aalisarneq ataatsimut isigalugu
Jens Kristian Therkelsen Inatsisartunut ilaasortaajutigaluni aamma Aalisarnermut, Piniarnermut Nunalerinermullu Ataatsimiititaliamittaaq ilaasortaq isumaqarpoq, aalisakkat suulluunniit tamakkiisumik atorluarnerunissaat siunertaralugu ingerlatilernissarput pisariaqartoq.
– Pisariaqartutut isigisama ilagaat, pisassiissutit tamaasa eqqarsaatigalugit piumasaqaasersuisarneq ilanngullugu sukaterneqartariaqartoq, tassami pisassiisarneq inuiaqatigiinnut tamatsinnut annerpaamik iluaqutaanissaa tamatta soqutigisarigipput qularutiginnginnakku, Jens Kristian Therkelsen oqarpoq nangillunilu:
– Pingaartumik pisassiissutit ataatsikkut amerlasuut pisassiissutiginerini, aalisarnermut inatsimmi pisassiinermut atatillugu piumasaqaatit naammassinniffiusussat erseqqissumik allassimasassasut politikikkut piumasaqaatigissallugu pissusissamisuussaaq, isumaqarpungalu piffissap ingerlanerani piumasaqaatit naammaginartumik naammassineqarsimatinnagit, pisassiissutit nalilersuiffigineqaqqittarnissaat pisariaqartoq, aamma taamak inissittoqartillugu utertitsinissamut periarfissaq ammatinneqartariaqartoq, Jens Kristian Therkelsen oqarpoq, nangillunilu:
– Aalisakkat suulluunniit tamakkiisumik atorluarneqarnerunissaat anguniarlugu sulinerit siunertalersorneqassasut Siumup kissaatigaa. Minnerunngitsumik uagut maani nunaqartugut niuernermi tassani qitiutinneqarluta aningaasarsiornissatsinnullu periarfissaqarluarlutalu ingerlatsinissarput pingaartutut isigaarput. Tassami sinerissap qanittuani aalisartut nunamut tunisiartuinnartarnissaanik eqqarsartarsimanerput nalilersoqqissallugu piffissanngortoq Siumut isumaqarpoq, Jens Kristian Therkelsen naggasiivoq.
–
Siumup aalisarnermut inatsisissamut sinaakkusiussai saqqummiussuuneqarlutik ingerlanneqarput. Una nalunaarutit tallimaassussatut naatsorsuutigineqartut pingajussaraat.