Naalagaaffiup naatsiiviata tunuatungaani inissisimanerput naammagiinnarsinnaajunaarparput. Namminersorneq pillugu Inatsit maanna atuuttoq, piffissap ingerlanerani ullutsinnut naleqqukkunnaariartorsimavoq. 2009-mut naleqqiullugu pissutsit allanngorsimapput. Nunarsuarmioqatigiit uagullumi Inuiaat Kalaallit ineriartornerup malitsigisaanik aamma allanngorsimavugut.
All.: Erik Jensen, siulittaasoq, Siumut
Siullermik Inuiattut Ullorsiornitsinni tamassi qamannga pisumik pilluaritsi. Ullumikkut Namminersorlutik Oqartussat 2009-mi eqqunneqarneraniit ukiut 14-nissaat inuiattut ullorsiorpugut. Ulloq inuiattut tamatta ataatsimoorluta katersuuttarfipput, tamattalu Kalaaliusutut imminut paasisartugut peqatigiilluta ataqatigiinnermillu misigaluta ullorsiorfipput.
Ukioq mannattaaq Namminersorlutik Oqartussat eqqunneqarneraniit ukiut 14-it qaangiupput, piffissanngorsoraaralu Namminersorneq pillugu Inatsit – uagut inuiaqatigiittut qinersinitsigut Inatsisartunut Naalakkersuisunullu naammasseqqullugu tunniussimasarput – pimoorullugu timitalerlugu naammassiniarlugu inuiaqatigiit alloriartariaqalersugut. Alloriaqqinnissatsinnut suliassavut Inatsimmi tunngavilerneqarsimasut allattoqqapput. Isumaqarpungalu oqartussaaffiit tigunissaat sukkatsinneqartariaqartoq, timitalimmillu alloriarnerit pisariaqartut ataatsimoorluta pisariaqalerivut.
Ingerlaqqissagatta
Siumut nuna tamakkerlugu juulip naanerani ataatsimeersuassaaq, inuiattullu ingerlariaqqinnissatsinnut apeqqut erseqqissumik akineqarlunilu sammivissinneqartariaqarpoq. Tamannalu piareersaateqarfigalugu ingerlanneqarpoq – ingerlaqatigiilluta alloriarnerussagatta.
Isumaqarpunga 2009-mut naleqqiullugu pissutsit allanngorsimasut. Nunarsuarmioqatigiit uagullumi Inuiaat Kalaallit allanngorsimavugut. Naalagaaffiup naatsiiviata tunuatungaani inissisimanerput naammagiinnarsinnaajunaarsimavarput, pisariaqartipparpullu killilersorneqarata nammineq nunatsinni oqartussaaqataaneq tamakkiisoq atulissallutigu.
Tunngaviusumik Inatsisissaq partiinit tamangajanniit suleqataaffigineqarsimalluni maanna missingiusiorneqarsimalerpoq. Inuiaqatigiittut qanoq ingerlaqqinnissatsinnut tikkuussivoq, aamma apeqqutinik tunngaviusunik qaqitsinissamik tamatsinnut pisussaaffiliivoq.
Siumut pisarnermisut apeqqutit tunngaviusut akissutisinissaanut suliaqarluni aallartikkumavoq. Pisarnitsitut apeqqutit erseqqissumik akisimallugit, peqatigiillutalu ingerlaqqinnissatsinnut tikkuusseqatigiissimalluta, ataatsimeersuarneq naammassissasoq kissaatiginarpoq.
Allanngortariaqartut
Namminersorneq pillugu Inatsit maanna atuuttoq, piffissap ingerlanerani ullutsinnut naleqqukkunnaariartorsimavoq. Pingaartumik nunanut allanut tunngasutigut oqartussaaffeqarsinnaanitta apeqqusersorneqartuartarnera naammaginanngilaq. Taannaavormi naalagaaffittut killilersorneqarata inuiassuarnik niueqateqarnerulernissatsinnut matuersaatit pingaarnersaannut ilaasoq. Taamatuttaaq maluginiarnartarpoq, inatsit qanoq Naalagaaffiup aningaasalersorneqarnissaanut sammiveqartiginera, naak Inuiaat Kalaallit ineriartornissaat kiffaanngissusermillu tamakkiisumik tigusinissaat pineqaraluartoq.
Pisariaqalerpoq ingerlaqqinnissarput siunertaralugu Siumut erseqqissumik ataatsimoorussamillu akissutisinissaa. Inuiaqartigiit aammalu partiit allat suliassamut peqatiseraagut. Amerlanerpaallu peqataatinnerisigut alloriaqqinnissatsinnut ukiorpassuit ingerlasariaqanngillat.
Ingerlaqqinnissarput Inuiaat Kalaallit tunngavississagaat Siumup kissaatigaa, tamatumalu aamma Inatsisartut aqqutigalugit ingerlanneqarnissaa ilanngullugu.