Kommuneqarfik Sermersuummit qinigaaffik uani 2021-2025 Paamiut immikkut ukkatarineqartussatut suleqatigiinnissamik isumaqatigiissummik kusanangaartumik oqaasertalerneqarpoq. Soorunalimi oqaasiinnaapput – aasiit. Nammineersinnaanngitsutut Nuummiit aqunneqarneqartariaqartutut inissisimaannarsinnaanngilagut
All.: Dorthe-Marie Mogensen-Fontain, Sermersuummi kommunalbestyrelsimut ilaasortaq, Siumut.
Kommuneqarfik Nuuk ineriartortuarsinnarpoq, Paamiuni pilersaarutaasut qangali pilersinneqarsimasut immikkut aallutassatut taaginnarlugit ingerlanneqaannartaraat. Taamatut oqarninnut patsisaavoq qinigaaffik aallartimmalli noqqaaleratta suleqatigiinnut apeqqutit uku tunniullugit:
- Qanoruna Paamiut immikkut sammineqarniartoq?
- Suut siunertaassappat?
- Qanoq iliortoqassava?
- Innuttaasut qanoq tusarniaavigineqassappat suullu pilersinneqarnissaannut siunertarineqassapput?
- Naak anguniagaq?
Ullorlu manna tikillugu akissut ataasiinnaavoq. “Sanaartugassatut pilersaarutaasut ingerlatiinnassavagut.” Akissut naammaginanngilluinnarpoq!
Paamiunimi pisariartitagut amerlapput, qissiminneqarnissatsinnulluunniimmi noqqaasariaqartuarluta.
Ineriartornissatsinnut pilersaarummik sukumiisumik annertunerusumillu pisariaqartitsivugut. Piareersimavungalu oqaloqataanissannut.
Maannakkut pilersaarutaasuni kinguartitsineq aallartilereersoq naammaginanngilluinnarpoq! Sakkortuumillu uparuarusuppara eqqagassalerinermi tigooraavik ukioq maanna aallartittussaq kinguartinneqarniarnera sakkortuumik akerlilerakku.
Ineriartorniarpugut
Meerartagut pinnguartarfeqanngillat ullutsinni naleqquttunik. Meeraaqqerivik meeqqerivillu ullutsinni meerartatsinnut tulluanngilluinnarput! Sulisut atugarisaat imaannaanngillat illutai qammasissiat nipimik tigooraaveqanngillat. 2029-imut utaqqisinneqarsinnaanngilluinnarlutik!
Aqqusinerput biileqartunut aserorteriviuvoq! Aningaasaliissutigineqartut asfaltilernissaanut naammanngilluinnartut missingersuusiarineqarput.
Inissiat ullutsinni naleqqutinngilluinnarput! Nutaanik amigaateqarpugut! Suliartortut nunasisut inissaqanngillat, inuerusagaaginnarsinnaanngilagut.
Iliveqarfissamik pisariaqartitsivugut.
Tikinneqarnerusariaqarpugut pissutsit ilisimalerneqartariaqarput. Oqartussaaffiit aalajangiisinnaassutsillu namminersorluta ingerlassinnaasagut amerlisarneqartariaqarput. Nammineersinnaanngitsutut Nuummiit aqunneqarneqartariaqartutut inissisimaannarsinnaanngilagut. Takuneqartariaqarpugut tusaaneqartariaqarlutalu.
Sumiginnaaneq naammaleqaaq, Kommuneqarfik Sermersooq tamarmiusoq isiginiarneqartariaqarpoq. Maanngaanniillu naammatsilluinnarpugut oqaasiinnaat tusartakkagut naammaleqaat, timitaliinissaq pisariaqarluinnalerpoq. Iliuuseqartoqartariaqarpoq maanna!