Anguniakkat

Ineqarneq sanaartornerlu

Siumut 2586 Views

Siumut anguniagaqarpoq innuttaasut tamarmik toqqissisimanartunik, peqqinnartunik akilerneqarsinnaasunillu inissianik periarfissaqartinneqassasut. Illuliortitsineq pitsanngorsarneqassaaq, innuttaasut tamatumani aamma annertuumik sunniuteqaqataanissaat pisariaqarpoq – amerlanerillu nammineq illumik piginnittuulernissaat aqqutissiuunneqassaaq.

Siumup sulissutigaa innuttaasut tamarmik ineqarnikkut toqqissisimanartumik, peqqinnartunik aamma akilerneqarsinnaasunik najugaqarnissaat, inuttut aningaasatigut inissisimaneq apeqqutaatinnagu.

Siumup anguniarpaa innuttaasut nammineq ineqalernissamut periarfissaanik annertusaanissaq. Aningaasaateqarfik pilersinneqassaaq piginneqatigiillunilu sanaartornermut tapersersuisussaq. Inissiat pitsaasuunissaat sanaartornermilu innuttaasut peqataatinneqarnissat anguniakkani qitiupput.

Illuliortiternermi nunatta pissarititai atorluarneqassapput: ujaqqat, sioqqat assigisaallu. Sanaartornermi avatangiisinik mianerinninneq kiisalu nukissiutit ataavartut atorneqarnerat siuarsarneqassapput.

Aningaasalersuinermi iluarsiissutit nutaat pilersinneqassapput – soorlu 95/5 aamma utoqqarnut 50/50. Sumiiffiit tamarmik illuliornissamut attartortarfiit aqqutigalugit sanaartorsinnaanngornissaat aqqutissiuunneqassaaq.

Utoqqarnut innarluutilinnullu naleqqussakkat, isumannaatsut peqqinnartullu sanaartorneqassapput. Pisariaqartitsisunut illutaarnissamut siunnersuineq periarfissaassaaq.

Pilersaarusiornikkut naammattunillu aningaasaliinikkut inissaaleqineq atorunnaarsinneqassaaq. Inissiat pisortat pigisaat atorneqanngitsut ajoquteqanngitsullu ingerlaannaq illusisussarsiuunneqartassapput. Suliffeqarfiit najukkami sulisuminnut inissaqartitsissapput.

Inissianik attartortittakkanik aqutsineq ataatsimoortumik ingerlanneqassaaq, allaffissorneq annikillisarniarlugu aamma piginnaasanik attassisinnaassuseqarnissaq pillugu. Pisortat inissiaataannik aqutsineq kommuninit ingerlanneqassanersoq misissorneqassaaq. Pisortat pigisaani illuliortiternermut aamma aserfallatsaaliinermut malittarisassat pitsanngorsarneqassapput, nakkutilliinerlu sukannersumik ingerlanneqassalluni.