All.: Anders Olsen, Kujallermi kommunalbestyrelsimut ilaasortaq, Siumut
Tamat oqartussaaqataaneranut tusarnaarsinnaaneq pisussaaffiuvoq, innuttaasullu Nanortallip immikkut kommuuninngornissaanik kissaateqarnerat ersareqisoq kommunalbestyrelsip aalajangernera tunngavigalugu pitsaasumik suliarineqarnissaa neriuutigaara. Matumani Nanortalimmi nunaqarfittaanilu innuttaasut taasitinneqartussanngorput, tamannalu Kommune Kujalliup suliassaraa, Namminersornerullutik Oqartussat ilisimatinneqaannartussaapput.
Anguniagaq upperigaanni anguneqarsinnaanera uppernarsarneqarpoq, minnerunngitsumik tunngavilersorluakkamik siunertaqaraanni.
Taamaattumik tulluusimaarlungalu qujamasoqaanga Kommune Kujallermi kommunalbestyrelsip tamakkiisumik siunnersuutima, tassalu Nanortallip immikkut kommuuninngornissaanut innuttaasut taasitinneqarnissaannut tunuliaqutsiinerannut.
Innuttaasummi oqariartuutaat ersareqaaq aammalu pisussaaffiuvoq naalaaqqissaassallugu nunami maani tamat oqartussaaqataanerannik ingerlatsiviusumi.
Naatsorsuutigilluinnarparalu kommunalbestyrelsemi tamarmiusunit isumaqataaffigineqartoq, tassalu Nanortallip nammineq kommuuninngornissaanik innuttaasut taasitinneqarnissaannik siunnersuut toqqammavigalugu Borgmesteri Allattoqarfillu kommunalbestyrelsip aalajangernera tunngavigalugu suliaq pitsaasumik kinguarsarneqanngitsumilli ingerlatissagaat.
Tamatumanimi Inatsisartut Naalakkersuisulluunniit utaqqeqqaarnissaat kinguarsaatigissallugu tunngavissaqanngimmat, kommunalbestyrelsillillu aalajangernera malillugu suliaq ingerlanneqartussaammat.