All.: Paarnannguaq Mathiassen, Ilulissat
Ilulissani imeqarfimmik anginerusumik pilersitsineq siunissamut anigaasaliinerussaaq. Taamaammat inatsisartunik suliarineqartariaqarpoq. Inuussutissarsiutinik nutaanik ineriartortitsinissaq illoqarfiullu ineriartorteqqinnissaanik eqqartuisoqartillugu tamanna avaqqukkuminaatsorujussuummat.
Mittarfissuit Nuummi Ilulissanilu sanaartorneqarput taakkulu piareeraluttualerlutik.
Nunaqavissut inuussutissarsiutinik pilersitsisinnaanerat aatsaat taama periarfissagissaartigalunilu siunissagissaartigaaq. Nunami inuussutissarsiorneq, imaani inuussutissarsiorneq, takornariaqarnerlu eqqarsaatigalugit.
Nunatsinni aningaasarpassuit atorlugit mittarfissuit aningaasaliiffigineqareersut atorluarnissaat akortariaqarparput. Kingusinaarneruvoq oqassalluni takornarissat aqunneqarsinnaasumik tikerartinniarneqassappata.
Isumaqarpungali umiarsuarsuit tikittartut nunaqavissunut iluanaarutaasumik, aqunneqarsinnaasumillu tikerartinneqarnissaat anguniartariaqaripput. Peqqinnissaqarfitta nammassinnaasaanik umiarsuarsuarnit tikerarneqarnissarput illersorsinnaasariaqaratsigu, peqqinnissaqarfipput tatineqassanngippat.