All.: Siumup Folketingimi allattoqarfia
Siumut tunuliaqutaralugu Folketingimi ilaasortaq Aki-Matilda Høegh-Dam sapaatip akunnerani matumani ulapaarpoq, ataatsimiinnerit assigiinngitsut peqataaffigalugit.
Socialdemokratit partiinik qaaqqusipput, tassani ’Meeqqat inuusuttullu inuunerisaat ineriartornerallu’ pillugu ataatsimiititsillutik. Ataatsimiinneq Marienborgimi ingerlanneqarpoq ataasinngormat, tassani Siumup Folketingimut ilaasortaatitaa partiillu allattoqarfia ataatsimiinnermi peqataapput.
Sammineqartut pillugit ilinniarsimasut ataatsimiinnermi saqqummiipput, Folketingimi ilaasortaasut saqqummiunneqartunut apeqquteqaateqarsinnaallutik.
Ataatsimiinnermi partiit peqataasut soqutiginnillutik tusarnaarput, ammasumik eqqartueqatigiittoqarluni.
Kalaallit Nunaanni aalisartut piniartullu marlunngormat ulloraat. Aamma tamanna Københavnimi Kalaallit Illuutaanni malunnartinneqarpoq Aki-Matilda Høegh-Damimit peqataaffigineqarluni. Malunnartitsinermi kaffeqarlunilu kaageqarpoq, tassanilu Aki-Matilda Høegh-Dam kalaallit Danmarkimi najugaqartunik oqaloqateqarluni.
Peqatigiiffik Mentor Immanuel Siumup Christiansborgimi allaffianut pulaarpoq pingasunngormat. Peqatigiiffik Danmarkimi isumaginnittoqarfimmi suliani siunnersuisarpoq, ataatsimiinnermilu Danmarkimi kalaallit meerartaasa angerlarsimaffiup avataanut inissinneqartarnerat pillugu aporfiusartut eqqartorneqarput.
Pissusissamisuunngitsumik kalaallit meerartaat angerlarsimaffiup avataanut inissinneqartarput, ataatsimiinnerullu uppernarsarpaa politikikkut suli iliuuseqarfigineqartariaqartoq. Qinigaaffimmi matumani peqatigiiffiup Mentor Immanuelip qanimut suleqatigineqarnera attatiinnarneqassasoq Siumut Folketingimit neriuutigineqarpoq.
– Ataatsimiinnerit assigiinngitsut saniatigut Folketingimi ilaasortanngorlaanik naapeqateqarpunga. Qinigaaffiup siuliani qinikkani inuusunnersaavunga, maannalu qinikkani inuusunnersanngortoq Liberal Alliancemit Helena Artmann Andresen sapaatip akunnerata siuliani naapippara. Qinikkatut tikilluaqquniarlugu avannarlermiut oqaluttuaatitoqaannit ilisarnaat Ydun tunniuppara, Folketingimi ilaasortaq Aki-Matilda Høegh-Dam oqarpoq.
Sapaatip akunnerani aggersumi assigiinngitsunik ataatsimiittoqaqqissaaq, ataatsimiinnerillu pillugit Siumut Folketingimi tallimanngorpat tulliani nutaarsiasseeqqissaaq.