Kikkut tamarmik ilinniagaqarnissaat Siumup anguniarpaa. Aqqutissiuussineq eqaatsoq ataqatigiittorlu atorlugit meeqqat atuarfianni naammassisut tamarmik ingerlaqqiffiusunut ilinniarfinnut pinngitsooratik ingerlaqqittarnissaat piviusunngortinniarlugu sulisoqassaaq.
Inuusuttut meeqqat atuarfiannit naammassereersimanermi kingorna ilinniarfinnut allanulluunniit ingerlaqqinngitsoortartut (sulinngitsut, ilinnianngitsut piginnaanngorsarneqanngitsullu) peqataalersinniarlugit ukiuni tulliuttuni naalakkersuinikkut iliuuseqarnikkut pinngitsooratik immikkut ittumik suliniuteqarfigineqassapput.
Nunatsinni innuttaasut 2030-imi minnerpaamik 50 %-iisa inuussutissarsiutinut imaluunniit ilisimatusarluni ilinniarsimasuunissaat Siumup anguniarpaa.
Ilinniarneq siunissamut aningaasaliineruvoq, taamaattumillu ilinniarnermut ilinniaqqinnermullu kikkut tamarmik periarfissaqartuarnissaat anguniartuartariaqarpoq, nunatsinni nunattalu avataani ilinniartut atugaasa inissaqartinnissaasalu isumagilluarneqarnerisigut. Aamma ilinniartunut meerartalinnut inissaqarnikkut meeqqerivissaqarnikkullu atugassaritinneqartut pitsanngorsarneqassapput.
Ilinniartitaanermi tamatigut nunatta pigisai nunatta tunniussinnaasai minnerunngitsumillu pinngortitap avatangiisillu atugassarititai aallaavigalugit ilinniarnerup ingerlanneqartarnissaa Siumup anguniagaraa.
Nunarsuarmi tamarmi sukkatsikkaluttuinnartumik ineriartorfiusumi nunatsinni innuttaasut ilinniarluarsimallutillu qaammaasaqarluartuunissaat Siumup pingaartilluinnarpaa, tassami Naalakkersuinikkut, niuernikkut teknikikkullu ineriartornermi, nunattalu nunanik allanik suleqateqarnerani ilinniarluarsimassuseq pingaaruteqaraluttuinnartumik inissisimammat. Nunanik allanik ilisimasaqarnerunissaq anguniarlugu ilinniartut nunani allani suliffinni sungiusariartarsinnaanerat nittarsaanneqarnerusariaqarpoq. Taamaammat tuluit oqaasii takornartat oqaasiini ilinniarneqarsinnaasuni sallinngortinneqarnissaat suliarineqassaaq.
Siumut isumaqarpoq meeqqat atuarfianni, atuarfinni ingerlaqqiffiusuni, inuussutissarsiutitigut ilinniarfinni sivisunerusumillu ilinniartitaanermi nunanut allanut unammillersinnaasumik ilinniarnissamut ilinniaqqinnissamullu pisortat periarfissaqartitsinissaat qulakkeersimajuarneqassasoq.
Nunatta avataani ilinniartut naammassigunik nunatsinnut uternissaat eqqarsaatigalugu eqaannerusumik aaqqissuussivigineqartarnissaat qulakkeerniartariaqarpoq.
Ilinniartitaanermut Siumup anguniagaraa sumiiffiit aallaavigalugit ilinniarnissamut neqerooruteqarsinnaaneq. Ilinniarnermi avatangiisit nukittuut piorsarneqartariaqarput, qaffasissumik pitsaasumillu tunngaveqartut. Tassani eqqarsaatigineqarpoq inuusuttut najukkaminnut qanittumi ilinniarsinnaanissaminnut periarfissaat. Najugaq qimannagu ilinniarsinnaaneq pilersinneqassaaq Ilisimatusarfik nunanilu allani ilinniarfiit suleqatigalugit, saniatigut suliutigaluni ilinniarsinnaaneq ammaanniarlugu.
Ilinniartitaanermut, ilinniartitseqqiisarnermut pikkorissaasarnernullu aningaasaliissutaasartut nunatsinni nunaqavissunut tunngatinneqartariaqarput, pissusissamisuunngilarmi inuit sivikitsuinnarmik nunatsinniittartut nunaqavissutuulli periarfissagissaartiginissaat.
Ilinniarnermut tunngatillugu Siumup makku ilanngullugit sulissutiginiarpai:
- Ilinniartunut praktikerfissat eqqarsaatigalugit eqaannerusumik aaqqissuussisoqartarnissaa anguniarneqassaaq.
- Danmarkip avataani, nunani allani ilinniarniartunut oqaatsinilluunniit pikkorissarniartunut aningaasatigut tapiissuteqartoqartarnissaa periarfissanngortillugu aaqqissuussisoqassaaq.
- Sanasunngorniarnermi praktikerfissat ajornartut qaangerniarlugit inatsisitigut aaqqissuussisoqassaaq, tamatumani praktikerfiusinnaasut amerlanerulernissaat qulakkeerumallugu.
- Ilinniartitsisunut inissat pitsaanerit atugarisallu pitsaanerit ujartorneqassapput.
- Nunatsinni ilinniarfinni tamani kalaallisut misilitsittoqarsinnaanera anguniarneqassaaq.
- Inuiattut pingaartitagut pillugit utoqqaat ilinniartitsinermi atorluarneqartarnissaat aqqutissiuunneqassaaq.
- Inunnguutsiminnik nappaateqartut siusissukkut ilinniarnissaannut periarfissiisumik periusissiuunneqartassapput.
- Ilinniarsimallutik nunatsinnut angerlartut meeqqeriviit inissaqarniarnerullu tungaatigut pitsaanerusumik inissisimalernissaat Siumup qulakkiissavaa.
- Oqaatsivut atorlugit ilinniartitaanerit pimoorunneqarnerussapput.
- Oqaatsivut atorlugit ilinniusiatigut ineriartortitsisoqassaaq, tabletsinut aamma iPadinik atorneqarsinnaasunik.
- Ilinniarfinni ilisimatusarfinnilu oqaatsivut atorlugit soraarummeertoqarsinnaanngussaaq
- Naqinnernik ilisarinnissinnaanngitsunut immikkut ittumik iliuuseqartoqassaaq, pitsaanerusumik ilinniagaqarnikkut ingerlariaqqinnissaminnut aqqutissiuunneqarnissaat suliarineqarluni.