Oqaatsivut sutigut tamatigut illersugaraavut, inerisarusuttuarpavullu aamma inuusuttortatsinnut soqutiginartumik ilikkarsarnerup imaqarnissaa inerisaaqataaffigerusukkatsigu. Inuiaqatigiittullu attassinnaanngilarput, ilinniarnertuunngorniarfinni kalaallit oqaatsivut tunngavigalugit ilinniartitsitsineq nukillaariartussappat.
All.: Najaaraq Møller, ilinniartitaanermut oqaaseqartartoq, Siumut
Nuummi ilinniarnertuunngorniarfimmi (GUX) kalaallisut ilinniartitsisussaaleqineq iliuuseqarfigineqartariaqartutut Siumumit isigaarput. Maannamut oqaluuserineqartarnerani akissarsiat pissutaasutut tikkuarneqartarput.
Ilinniarnertuunngorniarfimmi oqaatsitsinnik ilinniartitsisinnaajunnaarsimagutta, ilinniartitsisussaaleqinertut taallugu, misissugassatut piaartumillu aaqqiissuteqarfigisassatut isigivarput.
Sulilersitsisarneq, akissarsiat minnerunngitsumillu sulisut atugaannik ilorrisimaartoqarnersoq qulaajarneqartariaqarmata paasissutissanik perusulluta Siumumit apeqquteqaammik Naalakkersuisunut nassiussaqarpugut. Tusatsiakkat aallaaviginagit iliuuseqarsinnaalernissarput taamaalilluta qulakkeerneqarsinnaanngussammat.
Sulilerusuttut arlaqartut qularinngilarput, sorpiarlu peqqutaalluni sulilerusuttoqartannginnera paaseqqissaassallugu pingaartipparput. Assersuutigalugu Siumumit maluginiarparput, qallunaatut oqaasillit assinganik amigaataarpalunngitsut.
Akissarsiatigut appasippallaartoqarsimappat tamanna uggornassaqaaq, paaserusussavarpullu akissarsiatigut isumaqatigiissutit suunersut, tassami nalunngilarput ilinniakkat assigiinngitsut aallaavigineqarlutik ilaatigut atorfinitsitsisoqartarmat.
Sulisutigut aqutsineq qanoq innersoq paaserusupparput, arlaatigut ikkarnartoqarpat piaartumik tamanna aaqqinneqassasoq sulissutigissagatsigu. Sulisut atugaannik aamma paasisaqarusuppugut, qangamita kingullermik sulisut atugaat misissorneqarpat, massakkullu atukkat qanormita ippat?
Oqaatsivut sutigut tamatigut illersugaraavut, inerisarusuttuarpavullu aamma inuusuttortatsinnut soqutiginartumik ilikkarsarnerup imaqarnissaa inerisaaqataaffigerusukkatsigu.
Pineqartup piaartumik qulaajarneqarsinnaanissaa kissaatigaarput, inuusuttortattami tamanna pinngitsoorsinnaanngilaat. Inuiaqatigiittullu attassinnaanngilarput, ilinniarnertuunngorniarfinni kalaallit oqaatsivut tunngavigalugit ilinniartitsitsineq nukillaariartussappat.