Eqqartuussiveqarneq

Siumut sulissutigaa Kalaallit Nunaat suliassaqarfimmut nammineq oqartussaassuseqalissasoq, aatsaalli tamanna pissasoq eqqartuussiveqarnermut attuumassuteqartut tamarmik naalagaaffimmit isumannaatsumik ineriartortinneqarsimalerpata.

Siumup pingaartilluinnarpaa siunissaq eqqarsaatigalugu eqqartuussiveqarnerup politeeqarnerullu nunatsinniit oqartussaaffigineqalernissaa, tamannali aatsaat pisariaqarpoq suliffeqarfiit eqqartuussiveqarnermut attuumassuteqartut tamarmik isumannaatsumik naalagaaffimmiit piorsaaffigineqareernerisigut.

Tassunga tunngatillugu Siumup makku ilanngullugit sulissutiginiarpai:

• Nunatsinni eqqartuussiveqarneq nunatsinni pissutsinut naleqqussarneqassaaq.
• Inatsisilerituutut ilinniarsimasunik eqqartuussisoqartarnissaq pisariaqarpoq.
• Illersuisut ilinniartinneqarlutillu pikkorissartinneqartassapput.
• Pinerluffigineqarsimasunut pinerlussimasunullu katsorsaasarnissaq pitsaanerusoq anguniarneqassaaq.

Pinerluttunik pineqaatissiisarnerup pinerluutaasunut naapertuunnerusumik pillaasarnissaq anguniarneqarpoq. Nalilersuutinut ilanngullugit eqqarsaatigineqarput piffinni pissutsit pinerluffigineqartullu atugarisaat. Pinerlunnikkut eqqorneqartut isumagineqarnerisa sullinneqarnerisalu pitsaanerunissaat anguniarneqarpoq, tamatumani eqqarsaatigineqarput pinerluffigineqartut piaarnerpaamik ikiorneqartarnissaat saaffigisinnaasaasalu siammartertuarnissaat.

Nunatsinni inuit eqqartuussiveqarnikkut kiffartuunneqarnerat eqaatsumik ataqatigiissumillu suleqatigiiffiusumik piorsaqqittariaqarpoq. Siuliani taaneqartut aallaavigalugit pisariaqarpoq pinerlussimasut isumannaatsumik inissinneqartarnissaat, pinerluffigineqarsimasut pinerluttorlu tamaasa eqqarsaatigalugit.

Nunaqarfiit isertitsiveqalernissaat pisariaqavissoq anguniarlugu naalagaaffik aningaasaliissuteqartariaqarpoq, nunaqarfinni pissutsit naammaginanngeqisut aaqqiiviginiarlugit, tamatumanilu Namminersorlutik Oqartussat kommunillu suleqataanissaat pisariaqarluinnarpoq.

Kalaallit politiinngorniartartut amerlisartariaqarput politiit suliffimminni pitsaanerusunik atugassaqartilernerisigut, politiitullu atorfiup soqutiginarsartuarneratigut. Politeeqarneq nunatsinniit tiguneqarpat avatangiisimik piniakkanillu nakkutilliineq ilanngullugu politiinit isumagineqalissaaq, politiillu piniarnermi avatangiisinillu nakkutilliisussanik ilinniartitsisalissapput.

Siumut isumaqarpoq, ilinniartitaanerup iluani oqaatitsinnik piginnaasaqarneq naleqarnerusutut isigalugu inissinneqassasoq, piukkunnarsinnaasut qallunaatut piginnaasakinnerinnaq aallaavigalugu mattunneqartariaqanngimmata.

Taamatuttaaq Siumut isumaqarpoq ernumanartutut isigineqartariaqartoq ukiuni kingullerni amerlasuuni malunnaatilimmik kalaallit ukiorparujussuarni politiitut misilittagallit allanik periarfissarsiortalermata, suliffeqarfiummi iluani kalaaliuneq qaffakkiartornissamut aporfiussanngimmat. Tamanna danskit naalagaaffiannit iluarsiiffigineqarnissaa angutserlugu saaffiginnissutigineqassaaq.