Avatangiisit pinngortitarlu

Siumut sulinermini tunngavigaa pinngortitaq minguitsoq illersorneqassasoq. Inuit peqataatinneqassapput, mingutsitsineq akiorneqassaaq pinngortitarlu minguitsoq kinguaariinnut tulliuttunut qulakkeersimaneqassaaq.

Siumup sulissutigaa pinngortitap mingueqisup illersorneqarnissaa. Mingutsitsinerit suulluunniit akiorniarneqassapput, pisuussutivullu piujuaannartitsisumik aqutsiffigineqassapput.

Silaannaap allanngoriartorneranut atatillugu ilisimatusarnikkut ilisimasaqarneq ineriartortinneqassaaq. Issittumi silaannaap pissusaa pillugu ilisimatusarfimmik pilersitsisoqassaaq aamma nunat allat suleqatigalugit iliuusissanik ineriartortitsineq ingerlanneqassaaq.

Avatangiisinut ajoqusiinerit nunarsuarmioqatigiinnit pilersinneqartut Issittup inuinut uumasuinullu peqqissutsikkut sunniuteqarnerlunnginnissaat sulissutigineqassaaq. Ilisimatusarneq, paasisitsiniaaneq assingusullu, suleqatigiissitat kattuffiillu suleqatigalugit ineriartortinneqassapput.

Naalakkersuisut kommunillu suleqatigiillutik pinngortitaq avatangiisillu illersornissaat sulissutigissavaat. Nuna tamakkerlugu malittarisassanik nutarterineq ingerlanneqassaaq, najugaqarfiit avataani pinngortitamik atuineq toqqissisimanertumik ingerlaqqullugu. Akisussaaffiit agguataarneri ilanngullugit erseqqissarneqassapput.

Eqqagassanik passussineq pillugu maleruagassat ineriartortinneqartuassapput. Ikuallassinnaanngitsut (savimerngit il.il) immikkoortiterneqartassapput pisariaqarpallu avammut niuerutigalugit nassiussuunneqartassapput. Inuit, piniagassat avatangiisillu illersorniarlugit eqqagassat sukumiisumik iliuuseqarfigineqassapput.

Sumiiffinni tamani kuuffilersuineq ingerlanneqassaaq, ingerlaavartumik sumiiffinni tamani ikaarsaariartornissaq siunertaralugu pilersaarusiornerit aqqutissiuunnerisigut qulakkeernerisigullu.

Avatangiisinut Aningaasaateqarfik nutarterneqassaaq. Nunatsinnut eqqussorneqartut eqqakkatut avatangiisinut siammarternaveerneqarnissaat qulakkeerneqassaaq.

Siumup suliniutigissavai:

• Avatangiisimik pinngortitamillu innarlitsaaliuineq siunertaralugu innuttaasut akuutinneqarnissaat qulakkeerneqassaaq.
• Pinngortitap avatangiisillu saligaatsuunissaat qulakkeerniarlugu iliuutsit ersarissut ingerlanneqassapput.
• Silaannaap allanngoriartornera pillugu nunatsinni ilisimatusarnerit ingerlanneqartut innuttaasunit akuuffigineqartassapput paasititsissutigineqartassallutillu.
• Nunatta avatangiisittalu saligaatsuutinnissaat siunertaralugu meeqqat atuarfiini aallartittumik samminnittoqartassaaq aamma qaammarsaasoqartassaaq.
• Aalisarnermi atortut pinngortitami annaaneqarsimasut qimaannarneqarsimasullu eqqarsaatigalugit aalisartut qanimut suleqatigalugit akuttunngitsumik saliisoqartassaaq.
• Inuk imaluunniit suliffeqarfik mingutsitsisimasoq akisussaatinneqartassaaq.
• Piffimmi asimi mingutsitsisoqassanngilaq, eqqagassallu nammineq pilersitat akisussaaffigineqassapput najugarisamut nassarlugit eqqaavinnut iginneqartassallutik.
• Takornariat nunatsinnut tikittartut ukiut tamaasa amerliartuinnarput. Taamaattumik tamakkua annerusumik mingutsitsinnginnissaat pillugu nakkutigineqarnissaat pisariaqarpoq.