Sineriatsinni inissaaleqineq iliuuseqarfigineqartariaqartoq tamatta nalunngilarput, sumiiffinni innuttaasunut kiffartuussinerup nukittorsarneqarnissaa ilanngullugu. Naalakkersuisut siusinnerusukkut periuserineqartarsimasoq eqquteqqippalulermassuk neriuummik peqarnerulersitsivoq, taamaakkaluartoq pisariaqarluinnarpoq Uummannami inissanik sanaartortoqarnissaa
All.: Elisabeth Nielsen, Avannaata Kommuniani kommunalbestyrelsimut ilaasortaq, Siumut
Nuup avataani illoqarfiit nunaqarfiillu inissaaleqiffiungaatsiartut Namminersorlutik Oqartussat iliuuseqarfigisariaqarpaat, pingaartumik Uummannaq.
Inissaqarnikkut sulisussaqarnikkullu Uummannaq ilungersunartumik inissisimavoq, iliuuseqarfigineqartariaqartumik. Inissaaleqinerlu annertooq tamanna Avannaata Kommuniata kisimiilluni naammassisinnaanngilaa.
Uummannami suliffissaaleqisoqanngilaq, aalisakkanik suliffissuaqarfiit ukiup taamaalinerani suliassaarutsillutik sulisunik angerlarallartitsisarnerat eqqaassanngikkaanni.
Uummannami suliffiit inuleriffiusut pinngitsoorneqarsinnaanngitsut, soorlu peqqinnissaqarfik utoqqaallu angerlarsimaffiat, assut sulisunik amigaateqarfiupput. Sulisunik amigaateqarneq sulisunut sullitanullu peqqinnanngilaq. Sulisut amigarlutik sulisariaqartarput, tamannalu ingerlaannarsinnaanngitsoq tamatta nalunngilarput.
Suliffiit sulisussarsiortaraluarput, kisianni avataanit qinnuteqarfigineqartanngillat, suliffitsik aqqutigalugu inissamik tunineqarsinnaannginnamik. Allatut aamma pissutsit atuarneqarsinnaapput: Avannaata Kommunia suliartorluni nutserfigisassatut orniginanngilaq, kommunilu tassani Namminersorlutik Oqartussat suleqatigalugit annertuumik suliassaqarpoq.
Najugaqarfigisarput ineriartorneq eqqarsaatigalugu kinguussaajartulissanngippat, inissaqarnikkut allatigullu innuttaasunut kiffartuussinikkut nukittorsarneqartariaqartoq nalunngilarput. Apeqqummilu tassani najugaqarfiit naligiimmik ineriartornissaminnut periarfissaqarnissaat pingaaruteqarpoq, soorlu aamma sineriassuatsinni najugaqarfippassuit ineriartornissamik pisariaqartitsisut.
Taamaattumik Naalakkersuisut siusinnerusukkut periuserineqartarsimasoq eqquteqqippalulermassuk assut isumalluarnarpoq. Aningaasaatinnguavut atorlugit sanaartornerup sinerissamut siammaqqinnerunissaanik Naalakkersuisut siunniussinerat tusarlugu neriuummik peqarnerulersitsivoq.
Qangaaniilli Uummannaq nunatsinnut aningaasalersuinikkut pingaarutilimmik inissisimavoq, soorlu Marmorilik aatsitassarsiorfiugallarmat. Massakkut aalisarneq aqqutigalugu aningaasalersueqataavoq. Taamaattumik inissatigut ikiorserneqarnissamik kissaateqarneq pissusissamisoorpoq.