All.: Inunnguaq Reimer (Siumut Aasiaat) aamma Ove Berthelsen (Siumut Qeqertarsuaq)
Sumiiffitsinni politikikkut suleqatigiiffitta orniginartinneqarluni qinikkat ilaannit ilaasortanngorfigiumaneqartarmat assut nukittuallaatigalugulu nuannaarutigaarput.
Tassunga atatillugu immikkut ilaasortanngortut kingulliit, Qeqertalimmi Kommunalbestyrelsimut Nunaqarfinnullu Aqutsisunut ilaasortat tikilluaqqungaarpavut. Pineqartut Inuit Ataqatigiinniit nuussallutik aalajangersimapput, pisarnitsitullu oqaloqatigiinneq paaseqatigiinnissarlu siunertaralugit ingerlatsinerput nangissavarput.
Siumut tunngavimmigut tassaavoq naligiinnissamik, kiffaanngissuseqarnissamik akisussaaffeqaqatigiinnissamillu pingaartitsilluni politikikkut suleqatigiiffik, sutigut tamatigut immikkoortortaqarfinnit tunngaveqarluni ingerlatsiffiusoq. Anersaaq taanna nangillugu suleqatigilikkavut peqatigalugit ingerlaqqissaagut.
Taamaattumik politikikkut suleqatigiiffitsinnut ilaasortanngorlaat tikilluaqqungaarpavut, qularutiginatigu suleqatigiinneq pitsaasoq innuttaasunullu periarfissaqartitsinerulertussaq peqatigiilluta ingerlatissagipput.