Attaveqaatit

Siumut sulissutigaa innuttaasut tamarmik sukkasuumik akikitsumillu internetimut attavilerneqarnissaminnut periarfissaqassasut. Nunarput tamarmi attaveqaateqassaaq, innuttaasullu paasissutissanik eqqortunik pissarsisinnaassapput.

Inuiaqatigiinni innuttaasut paasissutissanik eqqortunik pissarsisinnaanerat demokratiimik ingerlatsinermut tunngaviuvoq.

Attaveqartarfiit (SoMe) atorneqarnerisa annertusiartornerat ilutigalugu, paasissutissanik eqqortuunngitsunik siammarterineq akiorniarlugu tusagassiorfiit nukittuut pisariaqartinneqarput. Siumut isumaqarpoq tusagassiorfiit pitsaanerpaamik nukittuumillu inissisimanissaat pingaaruteqarluinnartuusoq.

Immap naqqatigut kabelilersuineq ingerlaavartumik ineriartortinneqassaaq, attaveqaatit qajannaatsuunissaat qulakkeerneqaqqullugu.

Internetimik sukkasuumik akikitsumillu kikkulluunniit sumiluunniit atuisinnaanissaat Siumup sulissutigaa. Angerlarsimaffiit tamaasa attaveqaasersorneqassapput, akillu innuttaasut akilersinnaasaat aqqutissiuunneqassapput.

Qarasaasianik attaveqaatinillu ilinniarfiit nunarsuarmiunut unammillersinnaasut pilersinneqassapput.

Teknologii kikkunnut tamanut nutaanik periarfissiivoq, aamma inuiaqatigiinnut amerlanngikkaluartunut. Suliffeqarfiit teknologimik tunngaveqartunik aallartitsisut sumiluunniit pilersinneqarsinnaassapput, aamma nunaqarfinni.

Siumup suliniutigissavai:

• Attaveqaatit nunarsuarmi ineriartortitsineq malillugit ingerlaavartumik pitsanngorsaavigineqartut.
• Akigititat appasinnerpaaffissaminiitinneqassapput, flatratelu tamanut neqeroorutigineqassaaq.
• Internetimut atortut assigiinngitsut tamarmik (satellit, kabeli, radiokæde) ataatsimik akilittut aaqqissuunneqassapput.
• Kabelip piginnaasai tamakkiisumik atorneqassapput inuiaqatigiinnullu iluaqutaallutik.
• Kabelip piginnaasaata ilaa atorneqanngitsoq avammut tuniniarneqarsinnaassaaq.
• Nukissiorfiit Tusassillu suleqatiginerisigut fiberkabeli nunatsinni tamarmut siammarterneqassaaq.
• Datacenterinik pilersitsisinnaaneq pillugu periarfissat misissorneqassapput, mingutsitsinngitsunik nukissiuutit atorlugit isertitaqarfiusinnaasutut.
• Nunavummut attaveqarnissaq nalilersorneqassaaq.
• Aasiaat Radiup attaveqarnera pitsanngorsarneqassaaq, imarsiornermi VHF isumannaallisaataammat.